李施嬅在劇集《法證先鋒IV》扮演高級法醫，她坦言童年時，曾夢想當醫生：「姨媽係醫生，細個受佢影響好想做醫生。中學選修生物課，要解剖青蛙，我覺得好驚、好核突，見到血腥同內臟恐怖嘢，我嚇到想嘔。」兒時當醫生夢未圓，李施嬅今次演法醫卻過足戲癮：「始終電視尺度唔可以好血腥，屍體都係由真人扮，拍時成日見到好多唔着衫嘅人喺我面前，一晚一個又一個，唔係全裸，但見佢哋咁喺我面前都好尷尬。佢哋化妝都要全身搽白，冇血色，解剖時我又要掂佢哋，扮死人仲要唔郁閉氣，佢哋真係好專業。」
為入型入格，李施嬅努力揣摩角色：「我特別睇咗一啲外國資訊，睇吓法醫係點樣去查案同搵線索，我太投入睇到發噩夢。」法醫是專業人士，李施嬅笑說：「啲對白真係唔係人講，講到我嘔白泡，好多好專業嘅term。」