舊年畀選民以選票踢出屯門區議會而有「何已完」之稱嘅新界西立法會議員何君堯，日前同香港政研會及新界大聯盟等牽頭成立「23同盟」，推動《基本法》第23條立法。同盟上月底發動網上聯署，號稱收集到100萬個聯署，可能得23%係香港人，同盟擔心代表性不足，所以噚日喺多區擺街站收集簽名，但有網民就發現，佢哋會向聯署嘅市民派發抗疫物資，包括口罩、酒精消毒液，大鬧佢哋咁樣呃簽名真係好cheap。
阿婆阿伯「被支持」惡法
唔好以為八方齋噏，有人證㗎。西貢區議員柯耀林辦事處職員噚日同八方講，23同盟喺筲箕灣同西貢擺街站，都係一邊收集簽名、一邊派抗疫物資，街站附近甚至有警隊衝鋒車戒備，在場又有唔少大漢保護街站，當佢哋想舉機拍攝就會被阻擋，而現場有唔少公公婆婆排隊拎禮物，街站義工只係向排隊人士講簽個名就可以拎抗疫物資，但就冇特別講解任何23條立法相關事宜。
據柯耀林辦事處職員所得市民報料圖片所見，何已完都有出動到北角區收集簽名，但同盟一邊派防疫物資，何已完同身邊嘅大波Man石房有就一邊冇戴口罩咁同街坊交流。除此之外，柯耀林喺facebook分享咗大埔墟情況，見到早前喺微博呼籲「全國全民聯署」嘅光頭警長劉澤基亦現身，仲有人同佢合照。其實成個活動都唔知有幾多市民知簽名同23條有關，但又正如好多網民話齋，建制派一向都係呃呃騙騙，何況係何已完呢？
李八方