在剛播畢的ViuTV劇集《二月廿九》中，吳海昕演的Yeesa一角有兩個由中學時期開始的閨密，其中一個好姊妹「嘉嘉」，由張凱娸（KiKi）飾演，KiKi現年24歲，去年於演藝學院戲劇藝術學士（榮譽）畢業、主修表演，《二月廿九》是她的出道作，同劇男角「余家聰」劉俊謙是她的演藝師兄，她日前受訪時便大讚這位前輩，她說：「佢除咗係演藝嘅大師兄之外，靚仔得嚟好有實力，同佢合作嘅話會喺佢身上學到好多嘢，佢係有樣又有邏輯，好勤力嘅人。」
磨利周身刀
KiKi自覺能參與《二月廿九》是幸運：「我所有同學都做咗舞台劇界，我就好想試吓喺幕前有冇機會，有好多人鍾意睇呢套劇，希望大家都鍾意我呢個角色。我最長遠嘅目標係想用生命影響生命，有時你會睇到一個角色所做嘅嘢，佢會感動到你、影響你下一個行動，我覺得喺表演裏面搵到我自己。」KiKi還拿着結他自彈自唱：「我好鍾意音樂，由細到大都有學鋼琴，我今年目標想考演奏級二級，考完之後可以幫補吓，今年仲計劃考三級嘅調香師牌。」去年KiKi簽約公司成為熊黛林與Angelababy的師妹，她表示入行也是受二人影響。
屋企做後盾
近日武漢肺炎肆虐，KiKi趁着疫情沒工開， 愛上行山抗疫，也會趁機增值自己，她說：「因為唔知下個機會幾時嚟，起碼我多咗時間可以準備自己，例如寫歌、彈琴，好好運用𠵱家唔可以出街嘅時間。行山抗疫都係好好嘅選擇，吸吓新鮮空氣，我都做多咗運動同增肥，希望可以練吓肌肉，個人都健康啲。」KiKi目前過着零收入的日子，幸好有個書法家爸爸、飛機師哥哥，生活無憂，她說：「收入係好唔穩定，好慶幸我屋企唔係好急切要我養家，爸爸媽媽好好，畀時間我去追我嘅夢。」當日KiKi是擅自報讀演藝，她說：「當時理工大學收咗我讀設計，最後我偷偷退咗學，之後入演藝，父母開頭好唔支持，但我鍾意，佢哋見到我好努力，仲有少少成績，我係用誠意打動咗佢哋。」
採訪：羅慧敏
攝影：陳慧安