楊曜愷說，名字是父母找人按紫微斗數改的。稱呼起來，大多以為是較為街坊的耀海。
根據字書，曜字除了有照耀之意，所謂「日出有曜」之外，日、月，星均稱作曜，即日、月、火、水、木、金，土，七星合稱「七曜」。舊時分別用來稱一個星期的七天，星期日，叫日曜日，星期一，叫月曜日，到星期六，就叫做土曜日。沒錯，正是日本社會至今沿用的每周日子的叫法。
楊曜愷，Ray Yeung，是電影《叔．叔》的導演。電影獲得今年第39屆香港電影金像獎的9項提名，包括最佳導演及最佳原創劇本。
武漢肺炎蔓延之際，約了導演在電影公司高先的佐敦試影室做訪問。灰灰的天色，路上行人都戴上防疫口罩。佐敦站商場外，圍着數重輪候購買口罩的人龍。幸好眼前的導演，予人「日出有曜」的感覺：靚仔，爽朗，幽默，敏銳。
撰文：黎加路
攝影：翁志偉
赴英求學被歧視 經歷變成電影題材
13歲被送往英國寄宿學校生活的楊曜愷，意外地保留着地道的香港廣東話韻味，而《叔．叔》戲中的每一句對白，亦是出自他的「手筆」。被提名的這個最佳劇本，是楊曜愷先用英文寫好，再找人繙譯成中文；而對白，則是自己用錄音機錄下，再讓人逐句抄下來。
2014年，香港傘運的時候，楊曜愷剛在紐約度過第七個年頭。在哥倫比亞大學學習電影，取得藝術碩士學位後，自主開拍了第二部講述海外華人男同性戀者的英語長片《Front cover》（紐約斷背衫）。
翌年，他回到香港。
楊曜愷說：「想探討香港嘅情况係點。想講香港嘅故事，想拍一個同香港有關嘅故事。拍咗兩部都係英文，好想拍一部廣東話嘅電影，呢個係搬番嚟嘅最大原因。」
《叔．叔》的劇本，由2016年開始籌備， 講兩名香港年長男同志隱藏的夕陽戀情的故事。
「每一個project（電影）都需要四、五年，個內容一定要同我好有關連，代表某啲人出聲，有個使命，先至值得揼咁多心機、精神去做呢樣嘢。如果純粹做一樣嘢，係for entertainment（娛樂）嘅 project，你唔會花時間，精神落去。好有意思先做。」
楊曜愷所講的「同我好有關連」，是指男同性戀的故事。他在倫敦生活時，所拍的《Cut Sleeve Boys》（我愛斷背衫），以及短片《Yellow Fever》（黃熱），講的正是海外華人同志的故事，也是楊曜愷在英國求學、成長，以至工作，十幾年來的感觸。
1979年，港督麥理浩前赴北京，試探鄧小平對香港九七大限的口氣。這一年，楊曜愷剛好13歲，男拔萃的初中生，父親將他送往英國，離倫敦個多小時車程的赫特福德郡，入讀寄宿學校。
楊曜愷是家中獨子，有三個家姐，父親從商。他回憶稱：「屋企想我去，自己亦想走，因為本身都係一個好奇嘅人，好想睇吓外國嘅生活係點樣。嗰陣時仲係殖民地時代。」
問楊曜愷，幾時知道自己的同性戀傾向。他說：「知，知，好早知。香港嗰陣，13歲可能唔知，係唔係叫唔知呢，知定唔知，呢個好難講，都知嘅，可能未必認同，未必覺得嗰樣嘢係你囉。」楊曜愷笑言，「爸爸懷疑囉，因為有啲同學吖嘛，嗰啲同學全部都cam cam哋，都好美麗吖嘛。唔知道係gay，總之走埋一堆，鍾意買《號外》雜誌。哈，哈，指標嚟㗎。」
圓父母心願 再追求導演夢
一直以為外國所有東西都是好的，好崇洋的少年楊曜愷，入到英國寄宿學校之後，才嘗到始料不及的打擊。「因為太細，13、14歲，唔知到有種族歧視呢樣嘢，去到之後先至親身面對。吓，原來係咁㗎，原來有人會咁樣嚟對你㗎！」楊曜愷憶述。
白人學校，難得有兩、三個從香港來的高年班學長，楊曜愷以為可以「有偈傾」，怎料他們「有咁遠走咁遠」。楊曜愷說：「到咗我大過咗，我先至明白佢哋。可能佢哋掙扎咗咁耐，開始比其他鬼仔接受咗，如果再同中國人走埋一齊，可能影響咗佢哋。可能係出於對自已種族嘅羞恥，影響到佢哋想同自己膚色嘅人分開。」
楊曜愷慨嘆，寄宿學校的校風，沒有母校男拔萃那麼開放。他說：「有個法文先生好好笑，cam cam哋，每次上完堂都喊，因為啲學生對佢太差嘞，幾次都係喊住咁走，做咗一年就走咗。」起初幾年，楊曜愷都受到同學用言語的羞辱或是一些刻意的排斥，諸如「唔受你玩」這類無形的孩子氣。他坦言，「唔會同屋企講，講佢哋都唔會明。香港家長一定會話你錯，可能怪你太乸型，乘機教訓你，唔會同情你。」
「到我英文開始流利，有啲鬼仔朋友，嗰個人咪會睬吓你囉。」楊曜愷認為，「由唔明白點解，到適應、接受，對於一個十幾歲成長緊、塑造身份嘅時候，係一個好大嘅影響囉。」這也是他其後開拍《我愛斷背衫》及《黃熱》兩齣英語電影的原因。戲中藉着兩位新加坡華裔演員，飾演在外國長大、又不想跟其他中國人拍拖的故事，去講述自己成長的感覺。
離開寄宿學校，楊曜愷進入肯特大學修讀法律，成為一名律師，在倫敦工作。一直對拍電影有興趣的楊曜愷說：「其實當年讀法律嘅原因，係屋企想你有個咁嘅資格，响嗰個年代。我一直話唔想讀，佢哋一直要你讀，要你讀咁樣啦。咁最後畢咗業，都有做咗。」
滿足雙親的要求後，楊曜愷向雙親攤牌，表示不想再做法律工作。「嗰陣時都唔可以阻止你，因為已經成人喇。」他參加一些workshop的電影課程，開始拍電影。楊曜愷慨嘆，「你拍電影幾成功都好，响佢哋眼中，都唔及做醫生，律師好。」
對於自己同志的身份，儘管沒有告訴雙親，楊曜愷苦笑謂：「佢哋久唔久，就會有啲好有聯想嘅問題，介乎知與唔知之間，好似Versace（意大利同志時裝設計師）俾人殺死嗰陣時，就會講：唔好出咁多夜街嘞。有時好突然問你一句：你成日出街，有冇同陳百強玩呀。」楊曜愷打趣地說：「好彩從來冇問過識唔識羅文。好驚佢問我呢個問題。」
「好似套戲（《叔．叔）》入面阿海同個仔咁，個仔都知知哋老竇係，但係又唔會去問。」楊曜愷說。