公仔箱「大力士」未執包袱之前，周不時都會同公司啲姐仔傳吓緋聞，基本上由加入到離開，緋聞從冇停過。而傳出同大力士搭上嘅姐仔，除咗忽然富貴之外，仲有唔少出鏡機會，就好似扮參加節目入行嘅「小牛牛」咁，有傳聞話小牛牛受到大力士嘅照顧，除咗食得好住得好，一身名牌之外，佢仲水鬼升城隍，恃住有人照顧，唔憂柴憂米，當正自己係阿姐，開工擺晒款唔特止，仲要攞特權。
話說小牛牛之前受欽點做主角，不過論輩份嚟講，佢點排都好後吓，但偏偏要全世界遷就佢一個，佢竟然無理要求一班甘草演員開夜班，只係因為佢自己唔想開早，就要一把年紀嘅前輩捱更抵夜。最抵死係小牛牛明知自己犯眾憎，佢都完全唔在乎，日日開工都遲到早退，合作過嘅劇組同事對佢好不滿，但個個為求保住兩餐，唔想多事只好啞忍。果然風水係輪流轉，小牛牛冇咗靠山照顧，個個拍晒手掌，好多幕後仲話要開香檳慶祝，仲開始畀臉色佢睇。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。