都說「黃藍是政見，黑白是良知」。張立基說：「我一路以來都唔談政治，我覺得藝人談政治係一樣太敏感嘅嘢！」
政治可以不談，但感受不可能沒有。1986年參加歌唱比賽入行的張立基，算是最初代到內地發展的歌星，90年代中更搬到深圳居住，2008年尾才搬回香港。
跟內地打交道多年，張立基身邊亦有不少藍絲同行，勢估不到張立基會獨自默默在自家的私人面書做文宣，不用聲大夾惡，有時轉發一張圖，勝過千言萬語。
等如張立基在樂壇，從來不用攀登頂尖，他一直默默做自己；無論掌聲多少，快歌不用說，他的《妳好嗎？！》和《盼你此刻奔向我》，是可以聽一世的。
「我唔一定要返內地做嘢，呢個世界咁大，我覺得有我嘅自由囉！」除下口罩，這天喉嚨帶點不適的張立基說。
撰文：文嘉龍
攝影：沈健程
點解搞到人民鬥人民
張立基在他私人的facebook內，不時轉發抗爭運動的新聞內容，「我都有啲fans，走嚟話點解你要發呢啲嘢，我覺得我嘅facebook係我嘅平台，即係我做樓主，我有權發我啲嘢，你唔贊成唔緊要，你唔好過嚟搞事囉！」
有次他轉發了關於「私了」的內容，一如所料地立即被藍絲們狙擊。「我就唔係好明，人哋出去訴求，佢又走埋去挑釁人，其他人可能唔贊同我呢個講法，但係我睇嘅嘢實在太多！嗰啲人點解咁鍾意去搞人哋呢？我唔明白，我就發咗呢啲嘢出去，之後就有一啲所謂叫藍絲，將我啲嘢cap咗放去一個乜嘢撐警群組，嗰個群組又將我啲嘢轉發咗去微博。」
張立基對「私了」的看法是，「我睇得太多呢啲無端端俾人打，內地啲人又落嚟，無端端又攞刀攞盛，香港人都唔係咁，點解要將件事搞到係人民鬥人民，仲要山長水遠喺內地落嚟，唔通我哋香港人又走上去內地去做呢啲嘢咩，唔可以㗎嘛！我發咗呢啲消息出去，有人cap咗（圖），內地有好多網民，嗰啲五毛呀三毛呀，不停攻擊我！」
同輩歌手，有不少藍絲在身邊，如曾經當過張立基經理人的肥媽，就第一時間企出來撐警；但張立基則選擇企在年輕人學生的一方。「我係好唔開心，同香港大部份市民一樣，都係睇到好多警暴，點樣去打啲示威者，日日都有一啲跳樓，越嚟越多！我覺得香港點解會咁？其實我發放呢啲訊息，都係想畀多啲人知道𠵱家發生緊啲乜，我哋又唔係話搞亂呢個社會，我哋只係希望喚醒到多啲人！」
運動早期，張立基發生過「美麗的誤會」，「嗰次我啱啱去天水圍買嘢，撞到示威好多人，我都唔知乜嘢事，我就去影幾張相，附近啲人有啲認到我，我嗰日揸住個膠袋去買嘢，跟住就喺facebook度傳（開），話我喺度影人（大頭），影啲示威者！嗰時佢哋都唔知我係企邊面，唔知道我乜嘢政見，但係嗰時我都係站喺香港人嗰邊！」
我覺得個天唔畀我死
張立基成長在葵盛東邨，愛跳舞的屋邨仔，1986年參加了亞視第一屆的《未來偶像爭霸戰》，但原來他有好幾次機會是要參加無綫新秀的。「嗰時我已經職業跳緊舞，第一個叫我（參賽）係Michael黎小田先生，嗰時我喺海城（夜總會）做緊騷，佢知道我鍾意唱歌，佢話TVB會搞一個新秀喎，你有冇興趣參加，我想去報名嘅時候，比賽時間就撞咗，好蹺嗰段時間就係出咗埠，嗰時同肥姐、秋官，同葉麗儀，好多天皇巨星我都幫佢跳舞！」
當年參加第一屆《未來偶像爭霸戰》，至今仍在娛樂圈的，得張立基一人。「係呀！好慘，剩返我自己，其他退晒休！仲有嘅，第三屆李達成仲有唱，不過喺內地，甄楚倩（第二屆）就唔出嚟㗎喇，開頭好多人想話叫我去搵甄楚倩出返嚟，因為興返《流行經典50年》，好多人叫我不如搵返阿倩出嚟，佢都係唔想出嚟！」
張立基有舞王之稱，《Electric Girl》當然經典，他經歴了香港樂壇最光輝年代，「當其時8、90年代係好輝煌嘅時間，係七彩，好燦爛！當內地一崛起，香港就失色啦，因為有好多翻版，開始又興起台灣歌，內地歌星又崛起，香港市場又太細！」
《Electric Girl》後，張立基轉到內地發展，其實為逃情，當時他被圈外女友騙了數百萬，人財兩失更自殺過。「因為我感情問題，自己太投入嗰段感情，對方利用我嘅感情去呃我啲錢，我又放唔低，又自殺過啦！我覺得個天唔畀我死，應該仲有啲嘢留得返畀我嘅，所以我就決定離開香港囉！我對工作係無悔，但係我對感情係有啲甩漏，我回想返亦都冇後悔過，我係走（死）唔到，我就要生存落去，我點樣行返出嚟，我係有一段掙扎！我喺香港自殺，我又死唔去，死唔去我再喺香港，我就真係會再有第二次自殺、第三次自殺、第四次自殺，我一定要有一個解決，嗰時我冇朋友，我冇屋企人同我解決呢個問題！」
離開香港，是他唯一選擇，「我覺得一定要離開香港，我唔理任何嘢，唔理我以前去到幾高、幾有自己嘅成就，我唔理人哋當唔當我有成就吖，我覺得交代到自己，我覺得OK囉，我又唔想連累人！」
𠵱家都差唔多退休
離開十多年，重新尋回自己，「去另外一個地方生活，搵返自己，所以一下子我離開咗十幾年，嗰十幾年我都好唔開心，不斷喺個腦度不斷重複，處於一個灰色地帶係好慘，黑同白冇問題，但喺一個灰色地帶裏面係好辛苦，你好難走出呢個灰色地帶！」
2008年尾因為母親健康問題，張立基為盡兒子責任要照顧年邁母親，才由深圳搬回香港定居，之後遇上女友Fiona李鈺菲，兩人至今感情生活穩定，同為歌手的Fiona，大家也稱她為「基嫂」。「我覺得兩個人喺埋一齊，唔使話要結婚，但喺佢嘅立場我唔知，因為我冇問佢。我覺得兩個人鍾意喺埋一齊，最主要有個默契就OK啦！如果你話一定要有一啲規限，一定要有張證書先做到某一啲嘢，好似你去攞身份證，一定要張出世紙，咁咪去攞張出世紙囉，如果冇需要，我唔覺得一定要去結婚註冊！」
2015年，張立基曾在微博公佈女友未婚懷孕消息，更有結婚打算，可惜之後不幸流產，現在兩人都未再有生育計劃。「唔會喇，之前有過就唔諗住再生！其實嗰時我哋兩個都想要，但係嗰時個BB又好似唔係太適合出世，醫生亦都唔贊成，所以就冇要！之後我都有同我未婚妻商量過，佢都覺得唔係好想生，我見佢嗰時又好辛苦陀住BB，不如唔好要！其實我都係一個幾傳統嘅男人，我都想有返個，但係我諗天意啩！」
張立基說自己的人生從來冇規劃，「有好多嘢我好順其自然，好似以前讀書，有冇諗過之後要做乜嘢，我直頭完全冇諗過；到跳舞嗰時有冇諗過之後做乜，又冇諗過；走咗去唱歌，唱歌之後有冇諗過做咩，又冇諗過，其實我係一個好冇計劃嘅人，好順其自然，唱歌之後喺個江湖度碌吓碌吓，睇到好多嘢，幫到自己成長囉！」
人生下半場，是時候退下來。張立基說：「其實唱歌呢段時間，或者返咗內地呢段時間，人生歷練睇到好多嘢，但係到𠵱家都差唔多係退休時間，人到中年都差唔多要諗一諗，我都覺得快㗎喇退休，因為以一個唱跳歌手嚟講，係唔可以太耐㗎，你始終都要跳！（你仲跳到！）OK嘅，呃到吓人，暫時都可以應付到，但係我覺得都唔遠㗎喇，退休呢個時間！」
後記：警察故事
一些人生的重要時刻，是不可能忘記的。如張立基參加《未來偶像爭霸戰》，初賽和決賽時的情景，他都歷歷在目。問他初賽時的參選歌曲，竟然是《英雄故事》（《警察故事》主題曲）！
「面試唱《警察故事》，自己揀嘅！（𠵱家好唔啱聽喎！）𠵱家我當係一個笑話囉，你話警察嗰啲嘢，我都好難講，佢哋係要咁樣做，好多時候我哋都冇辦法，睇到太多呢啲新聞，又話無可疑呀，唔通我哋自己去查咩？站喺香港市民，我哋都好無奈！」
「憑自我 硬漢子 拼出一生痴」，如今聽來，難聽過粗口。
場地提供：五勺Goshaku