湯漢斯確診武漢肺炎，《阿甘正傳》那盒人生朱古力忽然變成炸彈，震撼力非同小可，網民縱使嬉皮笑臉清算他的銀幕黑歷史，由迷失機場數到流落荒島，出嚟行十次有八次撞板，語氣再輕佻，講到底並無惡意，只不過炫耀自己是忠心耿耿的戲院常客，影帝作品如數家珍。此湯不同彼湯，恕宿敵大膽假設，中招的如果換了湯告魯斯，你以為反應會這樣溫馨嗎？睇怕不但信奉神神化化的科學教被擺上枱，葡萄園言之鑿鑿的衣櫃之謎也再次成為話題哩！可見一個人的操行多麼重要，就像香港某六十歲富貴女子領嘢，惹埋身邊幾個親密接觸者，坊間頻頻只聞「天冇眼」，因為「點解傳畀女傭傳畀狗，都唔傳畀三叔」，熟悉越劇的朋友二話不說把情節譜入《陽告》，粵劇發燒友則寄調《打神》，分別透過犀利的水袖和凌厲的女腔，控訴海神爺怠工。積善之家福有攸歸，好好先生一定大步檻過，冇事冇事冇事。
呢期興「正面啲諗」，最愛跟潮流的我當然不甘後人，茫茫腦海即刻浮起洛赫遜的音容。吓，邊個嚟㗎？從未聽過此名字的後生仔後生女且勿抓狂，耐心聽伯伯解釋：高大英俊的洛赫遜，上世紀中是荷里活寵兒，八十年代患了愛滋，終於紙包不住火，消息登上頭條，令當時懵閉閉的普羅大眾集體驚醒，不但啟蒙了對惡疾的認識，也推動美國政府關注，正面處理刻不容緩的公共健康問題。武肺得到湯漢斯這樣一個頂天立地的海報男孩，純屬不幸中的大幸，有他做代表，湖北人意大利人既可鬆一口氣，疫症從此也可望歸於正常化，逐漸減低歧視。