武漢肺炎疫情已經蔓延至歐洲球壇，曼聯喺周四作客奧地利球隊寧斯嘅歐霸盃16強首回合賽事都要閉門作賽，不過紅魔嘅表現似乎就未受影響，球隊靠五位球員建功，作客大勝5:0。不過另一方面，曼聯嘅市值亦都因為疫情問題令股價大跌而蒸發咗5億鎊（約50億港元）。
曼聯喺周四嘅歐霸盃賽事未有鬆懈，除咗因傷缺陣嘅迪基亞同安東尼馬迪爾之外，繼續派出哈利馬古尼同埋波基斯費南迪斯（B費）等正選出擊，並且喺開賽28分鐘就靠近期表現大勇嘅借將恩哈路禁區頂射入一球死角波先開紀錄。
換邊後紅魔繼續搶攻，58分鐘再由丹尼爾占士將比數拉開至2:0。到比賽尾段，曼聯都未肯收手，82分鐘由桑馬達接應費特洛迪古斯嘅直線單刀射成3:0，補時階段再有後備入替嘅格連活特同安達斯彭利拿各建一功，最終大勝5:0，基本篤定晉級八強。
蘇B想買斷恩哈路
曼聯近期表現認真唔錯，各項賽事計已經11場不敗兼3連勝，不過球會近期喺股市就失利喇，由於世界各地股市都受武漢肺炎同油價戰影響而下跌，喺美國掛牌嘅紅魔都不能倖免，球會股價由2月底嘅19.34美元跌到𠵱家得番15.42美元，而球會嘅市值亦都由上年5月嘅30億鎊跌到得番25億鎊，足足蒸發咗5億鎊咁多。
歐霸盃大勝寧斯
雖然紅魔最近唔見咗好多錢，好彩班球員都表現生性，尤其是冬季轉會窗由士砵亭加盟嘅B費同恩哈路都有貨交，令球隊繼續保持下季重返歐聯嘅希望，領隊蘇斯克查周四賽後仲點名大讚恩哈路嘅表現，仲暗示可能會出錢買斷呢位上海申花前鋒㖭：「恩哈路由一月嚟到曼聯至今嘅表現都好好，佢亦都好享受呢度嘅生活。佢係一位好有質素嘅前鋒，我哋下季都希望繼續有呢類球員喺度，我哋會睇吓今季之後會點樣做。」
曼聯自從一月買咗B費返嚟之後成隊都脫胎換骨咁，外界就估計紅魔嘅法國中場保羅普巴離隊嘅可能性會因為B費嘅出現而進一步提高，不過蘇斯克查就話唔會咁輕易放走普巴：「我哋同普巴仲有兩年合約，而且仲可以自動續約一年，佢下季會繼續留隊。事實上我一直希望睇吓有普巴同B費在陣嘅曼聯中場係點樣。」
另一隊英超兵狼隊，喺歐霸盃16強首回合賽事作客希臘奧林比亞高斯就贏唔到波，喺多打一人情況下只能逼和對手1:1。