【地產專題】武漢肺炎疫情持續，除了去水渠U形隔氣，室內外露喉管接駁亦有漏氣播毒風險。資深驗樓師詹濟南日前驗收新地（016）大埔白石角雲滙一個約2,000萬元單位，即場教路以番梘泡鋪在喉管駁位，無「波仔」吹出即無漏氣。惟睡房牆身驚現一處闊約1呎、長約6呎的批盪空鼓，或須打針灌漿；由於單位面積達953方呎，且主要問題僅此一處，故驗樓得分達96分。
業主霍先生去年4月以約2,000萬元買入雲滙實用953方呎單位，驗樓當日發展商送贈防疫包，包括五個口罩、一支酒精搓手液及一包濕紙巾。甫入單位，詹濟南見客廳與露台間加裝了一道隔音趟門，指：「單位對出係內街，嘈極有個譜，設計多餘。」惟業主不介意這項設計，認為打開露台門後關上隔音趟門，既可隔音也可通風。
霍先生最擔心漏水，詹Sir檢驗兩個廁所及廚房，來去水喉都沒漏水，但疫情持續，業主始終擔心喉管會否漏氣播毒，詹Sir回應：「放心，呢個單位排水設計多咗分支喉，只要用洗手盆，就會倒水落隔氣。」但兩個廁所都有瑕疵，客廁坐廁輕微搖晃，可攝「戒指」調校至平衡；玻璃浴屏起「雞粒」，但只有數粒，未到每平方米25粒更換準則。主人廁所坐廁底螺絲無扭實，相信工人冒失，「問題雖小，處理亦簡單，但一旦外出旅行後就滴吓滴吓，不過相信地台去水去得切」。
牆身有批盪空鼓 須打針灌漿
走到工人房廁所，他一邊摸外露去水喉一邊說：「好多人擔心坐廁氣喉。曾經有人改動坐廁，冇封實條氣喉，結果漏氣，好似上次青衣康美樓事件，導致有人感染。過往都係駁口位漏氣，𠵱家睇到呢條喉用咗膠水封實。」為求穩陣，業主想詹Sir檢驗，詹即場教路用番梘泡鋪於喉管駁位，若喉管駁位有明顯波仔吹出，就是漏氣。經測試後，喉管沒有漏氣。
單位最大問題是牆身批盪，詹發現細房有一處寬約1呎、長約6呎的批盪空鼓，他以金屬探測器檢查，並謂：「有時有鐵網喺入面，敲到空鼓係正常，所以用呢個儀器驗吓。但呢幅係石屎牆，唔應該有鐵網，所以應該係空鼓。」他建議業主要求發展商鏟底重鋪或打針灌漿。雖然空鼓面積大，但全屋僅此處，其他瑕疵少，單位得96分，詹指：「其他問題瑣碎，扣唔到太多分，主要扣分就係空鼓，由於單位大，系數有別於細單位，所以得出呢個分數。」
霍滿意單位質素，就目前疫情樓市，他表示：「唔驚嘅，你唔會知樓價係幾時最高、幾時最低。個個都覺得現時厲害過沙士好多，亦都有人講如果再有沙士，一定要買樓。我睇近期樓價係有跌，但冇跌得咁厲害，唔會一跌就跌到好瘋狂嘅價錢。」雲滙新近租賃成交，如3座中層A3室，實用面積381方呎一房間隔，以1.35萬元租出，呎租35.4元，原業主2019年以715萬元購入，租金回報率僅約2.3厘。新地發言人回應指，上述單位已即時派員跟進，本周二完成所有跟進工作，現已通知業主可驗收。
