立法會選舉9月舉行，新民黨之前推出內部初選機制，破天荒容許黨外人士參選，又傳自由黨「西門梓」李梓敬會走去參加，噚日佢向一啲人發短訊，宣佈已經報咗名參加新民黨新界東嘅初選，正式同新民黨呢區立法會議員容海恩拗手瓜，爭出戰立法會新界東嗰個議席，咁李梓敬自然想用新民、自由兩黨名義參選，不過自由黨黨魁鍾國斌講明唔接受「雙牌頭」參選，仲唔排除會踢佢出黨。
李梓敬喺短訊除咗宣佈報咗名參加新民黨初選，仲話會以平常心對待，期望係初選同其他參選人討論香港願景，但成個短訊冇提事前有否徵得自由黨同意，同埋會否退黨。
唔排除踢出自由黨
八方問過鍾國斌，佢話李梓敬事前冇通知佢參選決定，講明自由黨唔接受跨黨參選，唔接受「雙牌頭」，亦唔排除會踢佢出黨，不過要稍後開中委會傾。至於有冇對李梓敬失望呢？鍾國斌話李梓敬要爭取自己未來前途，佢都明嘅，所以唔會用反骨嚟形容，但就唔評論李嘅勝算，仲話人哋嘅前途唔關佢事！