現年45歲嘅名模周汶錡同法籍老公Julien Lepeu結婚八年，當大家以為佢哋成功度過七年之癢嘅時候，Julien日前就被影到喺距離淺水灣寓所只有5分鐘車程嘅深水灣，同外籍女喺茶座撐枱腳偷食。據報道指兩人表現親暱，冇戴婚戒嘅Julien不時撫摸女方頭髮又錫額，甚至不停火辣啜嘴，最後更同車離開繼續下場。而私會女伴後過兩日，Julien就戴返婚戒，揸車同兩個仔Jacques、Avner去附近沙灘玩，做返個好爸爸，但未見周汶錡同行。
其實周汶錡星期日先喺社交網晒陽光與海灘相，留言：「媽媽放假，爸爸湊仔。」估計近日趁老婆唔喺香港乘機偷食。事後傳媒追問周汶錡，佢就避答：「唔好問我。」對於姐夫爆出偷食醜聞，周勵淇就話：「冇回應。」
早有前科
Julien生性風流，早年同周汶錡拍拖時已經被影過啜爆奀星張苡嬍。周汶錡2006年結識比佢細三年嘅Julien，Julien出生於珠寶世家，爸爸Richard係Richemont集團財務董事，媽媽Evelyne亦係珠寶界名人。Julien喺2014年斥資超過3千萬買入上環西街一個兩層高地舖，𠵱家估計市值過億。
撰文：馮仁昭