【娛樂人物】現年38歲的2002年港姐季軍胡家惠原本一家四口生活美滿，可惜四年前發現丈夫有外遇，經歷離婚、躁鬱，更一度仰藥自殺。去年終於走出谷底，在中環開美容院，胡家惠說自己才是人生的主人︰「留返條命先，就乜都可以做到！」近日疫情嚴峻，胡家惠還派口罩、湯包給長者，幫助人也為自己帶來正能量。
採訪：林妙萍
攝影：周樂恒
胡家惠坐在自己新開設的美容院內，即使面對疫情生意大跌一半以上，就連原定上月的開幕儀式也要取消，依然笑得出。其實過去四年，她先後經歷失婚、躁鬱、仰藥自殺，她做完訪問就去蒲街市買餸，湊女拍拖：「疫情總會過去，留返條命先，就乜都可以做到！ 」胡家惠現時與5歲大女和3歲細女家住西貢獨立屋，走過低谷人生的她，現時想通，自己才是人生的主人，積極面對，有條命才有下一步。
陀B遇老公出軌
2002年，胡家惠參選港姐獲得季軍，在無綫工作兩年後往外闖，做過空姐、開公關公司、韓國護膚品店，又繼續讀書取得酒店管理學位。她在2011年嫁給拍拖多年的室內設計師邱仲平，老公的公司於2016年在創業板上市，兩人身家升至過億。一切本來很美好，卻在她陀上第二胎時發生突變：「嗰時佢啱啱上市，一上市就俾我發現佢有第二個女人！」
胡家惠頓時覺得整個天塌下來，丈夫不忠，她也產後抑鬱，之後試過多次自殺，試過開車到飛鵝山想疾衝下去，又試過在酒店仰藥、用鉸剪插手自殘，幸好，死不去：「嗰時唔係恨佢，係唔抵得，諗唔開。明明我識你時，你係乜都冇，我同你一齊捱，嗰時工人都冇個，喺屋企拖地、洗衫、煮飯都係我一個，做到事業咁好時，就遺忘咗我，成果畀第二個女人享受咗，我個心係唔舒服，唔甘心。」
躁三日鬱三日
當時是幸福闊太的胡家惠外表風光，忽變離婚收場，因為想不通又自覺失禮，不敢和家人、朋友講，令她的抑鬱症拖了一年，到2018年再確診躁鬱症：「情緒病真係好可怕，加上我嗰個係躁鬱症，躁鬱係比較麻煩，當你躁（躁狂）時，你係可以正常活動，去應酬、食飯，連續三日都好精神，瞓兩、三個鐘就夠。突然由躁跌落鬱時，你係乜人都唔想見，每朝一起身就發現自己講唔到嘢，好似有人摙住你條頸咁，講唔到嘢，之後不斷喊，三日唔沖涼、唔洗頭、唔飲水、唔食嘢，困喺房入面，細女狂喊，大女拍我房門，我都冇理佢，冇辦法。」
躁三日、鬱三日的情況不斷循環，整整持續一年，胡家惠直到被朋友發現捉去看醫生，展開漫長治療之路。精神科藥物副作用多，貪靚的胡家惠不想因吃藥暴肥，另一種藥物會令人昏睡，沒法湊女又不能吃，最終她揀選了有致命風險的一種藥物，無奈身體出現過敏：「個腦不斷咁扑扑扑扑，講緊十個鐘頭不斷扑扑扑扑，辛苦到我直情想搵個鎚仔打自己個頭，真係好辛苦！」
最後，胡家惠轉為接受心理輔導，醫生叮嚀她每天做功課：「每一晚記錄低自己感受，每晚畀30分鐘自己放空，唔諗任何嘢，唔可以用腦，總之做啲自己鍾意嘅事，咁我咪拉吓筋、散吓步、攤喺梳化食雪糕、聽音樂、煮嘢食咁。原來每一日嗰30分鐘完全屬於你自己嘅話，會將所有煩惱、唔開心都消除咗，你會感覺每一日都係好美好。」
「終於有返自己」
胡家惠如夢初醒般，慢慢調整身體及心靈，走出低谷，重新出發，開始做健康湯包生意，也捐贈給獨居長者，也會去做義工，之前在越南撲口罩送給基層：「每個月都捐100至200包湯包畀獨居老人，做咗成年，做義工又接觸吓其他人咁。我鍾意扮靚，9月同拍檔開咗新嘅美容院，好開心，覺得終於有返自己。𠵱家諗返，一個女人都唔應該長期依賴一個男人，就算當年我幫佢，我都應該有返我自己存在，𠵱家我有拍拖、有囡囡，有自己生意，冇恨佢囉。」四年經歷太多，胡家惠體會最深是生命才最重要：「疫情點都會過去，最緊要唔好病，留返條命先，留返條命就乜嘢都可以做到㗎喇！」
場地提供：Ciao Bella