由佔中到反送中，香港呢幾年踏入抗爭歲月，當日掀起第一波抗爭嘅佔中三子之一陳健民（KM）教授，上年被判入獄16個月，佢一邊提出上訴但同時堅持入獄。呢個星期六佢終於刑滿出獄，同案另一被告嘅立法會議員邵家臻，噚日去壁屋監獄探過KM，引述對方話「服刑完畢，如釋重負，很是自在」，出獄後最想食碗雲吞麵；不過因疫情來襲，KM呼籲大家盡量減少人群聚集，「接放學」可以用WhatsApp就得，但據知朱牧同戴耀廷教授等佔中八子照樣到場，實行九子再聚首。
邵家臻探監
剛過去星期一其實係KM嘅61歲生日，但監獄裏面冇人知，邵家臻話KM當日照樣當值做清潔硂搬水硂倒垃圾工作，十分自在，最多哼吓《阿信的故事》主題曲喎。星期六朝出獄，KM會喺監獄外有個簡短發言，之後返屋企同家人共聚，仲希望傳媒畀啲私人空間佢哋。
KM作為社會學學者，呢段失去自由嘅日子就將監獄變成無牆教室，獄中義務教囚友英文，前前後後教過七個學生，「由he she it都唔識到學到簡單生活會話，經驗很是深刻」；KM收到唔少支持者寫信畀佢，有人話𠵱家終於體會爭取普選嘅重要，呢啲醒覺故事令KM覺得吾道不孤。雖然服完刑，但案件未畫上句號，上訴聆訊因為疫情關係而延期，結果隨時令KM白白坐監，但佢就唔覺得可惜。
李八方