現年36歲、台灣前女F4成員劉樂妍（Fanny）長居內地，閒時會喺網上發表親中言論，所以被網民封為「女版黃安」，不過日前佢竟然靜雞雞返去台灣避疫。據台灣蘋果新聞網報道，劉樂妍上周六由天津返台，有醫院內部人士爆料，話佢去到醫院就入住加護病房。醫院一位內部人士表示，唔清楚劉樂妍住院病因，不過就話佢同武漢肺炎確診患者有接觸史，同時又有讀者爆料指佢喺急診護理站篩檢時，最初都冇講自己由內地返台灣，刻意隱瞞旅遊史，當醫生讀取佢嘅健保卡，佢先肯講真話，不過院方就回應：「不便透露病人隱私！」
過千網民狂轟
一直賺人仔嘅劉樂妍，隱瞞旅遊史返台就醫事件曝光，引發過千網民留言狂轟，「說中國好的人全都不留在中國」、「靠背台灣還回來醫病，拜託多收一點健保費，醫療費也收多一點」。有指劉樂妍入院係因為腹痛到台北醫學大學急診，其後診斷出消化性潰瘍，要立即住院開刀同插喉，因開刀會全身麻醉，所以被安排進加護病房觀察。台灣蘋果新聞網噚日仲報道，醫院被傳媒追問後，估計唔想事件發酵，噚日已幫佢安排轉到普通病房。
劉樂妍噚日回覆台灣蘋果新聞網，解釋係因為肚痛入院，仲大鬧有人追問佢媽媽有關佢就醫嘅事，佢話：「叫那些人洩恨衝我來，不想活的人是我！我跟台北市衞生局都是有報備的，而且我是肚子痛。跟肺炎沒關係呀！一個沒有血親關係的阿姨來接我，她回家隔離了。全部合法，別造謠了。」之後佢仲傳咗一段聲稱係同台北市衞生局人員對話嘅音檔，證明自己就醫一事冇違反規定。劉樂妍仲解釋話本來喺河北省動手術，但做手術前冇人幫佢簽字，「我又是台灣人。我很傷心，我沒結婚。我好想結婚，結婚就有人可以幫我簽字了。」
撰文：馮仁昭