民主派上年11月成功光復區議會，但當時選舉被揭發有唔少騎呢問題，事隔三個幾月，選管會噚日出咗報告書解開一啲問題選票疑團，包括《蘋果》當時發現，葵青區由梁耀忠贏出嘅選區，候選人總得票多過投票人數，報告書用咗四頁交代件事，話同「投票站主任沒有熟習工作守則之故」有關，將部份「損壞」選票補發畀選民，令到最後計錯數。不過，唔啱數情況比《蘋果》發現嘅嚴重，由5票變60票，由於條數最終對唔番，當局唔排除涉及非法行為，已將個案轉介執法機關調查喎。
投訴破紀錄4.5萬宗
報告書仲提到其他問題個案，包括有選民唔使對身份證就獲發選票；觀塘有票站出現兩張東區選票；同埋有兩個票站重點後出現「逆轉勝」，最前者要搵執法機關跟進，中間個案就同工序有關。至於後者，報告話真實情況唔係好似當時傳媒報道咁，即係並無此事，但認為要加強公眾包括傳媒對點票程序宣傳。
呢屆投票率創新高，投訴數字增幅亦驚人，同樣係歷年之最多達4.5萬宗，當中1,400宗涉及刑事毀壞、暴力恐嚇等行為，投票日投訴更較上屆多兩倍，家陣仲有超過6,000宗有待調查。