內地女星劉亦菲於香港時間噚日喺洛杉磯出席主演嘅迪士尼電影《花木蘭》（Mulan）全球首映禮，除邀請唱主題曲嘅美國樂壇天后Christina Aguilera出席，同場仲有甄子丹、李連杰帶同兩女一齊參與。不過就算首映禮有Christina加持，唔少網民仍然洗版式重提劉亦菲舊年喺微博轉發內地官媒《人民日報》「我支持香港警察，你們可以打我了」字句撐警一事，決定繼續罷睇。
嫲嫲仲喺武漢
劉亦菲喺首映禮上表現風騷，仲大派飛吻，身為武漢人嘅佢接受傳媒訪問時被問到仲有冇家人喺武漢？佢即時收起笑容，用英文答：「我的祖母還在武漢，她很好，我認為現在大家很謹慎照顧自己和身邊人，希望一切都盡快好轉。」李連杰喺戲中飾演皇帝，佢拖住兩個女行紅地毯時話：「女兒說宣揚中國文化是我的責任。」另外，Christina Aguilera則表示，今次唱嘅主題曲名叫《Loyal Brave True》：「《花木蘭》是我生命中重要的一部份，這也是經典的美麗延續。」佢亦會重新錄製經典作《Reflection》，當年歌曲推出時Christina只有16歲，該歌曲成為動畫版《花木蘭》嘅金曲之餘，亦成為佢事業上嘅里程碑。
撰文：馮仁昭
