今年70歲的富商「劉公子」劉定成,2012年因非禮罪及刑事恐嚇罪成,被判囚17個月。2014年出獄後他決心重整人生,由當年的雨傘革命走到去年開始的逆權運動,他上街又捐錢。回望前半生的渾渾噩噩,現在他活得精采,更指有生之年都會力撐民主運動,暗寸特首林鄭月娥是「鄭越訛」,以及曾到他家中拍裸照的現任高級警司吳樂俊「為錢出賣色相、良知」。
劉定成外祖父是廣東賭王霍芝庭,他含着金鎖匙出世,有錢就任性。同性戀的劉公子早年沉迷為同性拍照,2012年因非禮及刑事恐嚇罪成入獄,人生跌入谷底,2014年出獄後決心重整人生,同年9月爆出雨傘革命,他低調到金鐘支持,及至去年6月逆權運動展開至今,他也積極參與。
「我係深黃」
劉公子訪問前堅持要叫口號「五大訴求,缺一不可」,他說︰「我係深黃,我住跑馬地,鄰居都係藍,黃嘅朋友佔百分之九十九。」劉公子稱朋友間未有因政見不同撕裂:「我唔會同藍絲朋友割席,彼此尊重、包容,同黃絲傾偈就梗係手舞足蹈,好多話題。」有經濟能力的劉公子不但低調幫手足,政府日前宣佈派一萬元給合資格市民,他呼籲:「希望大家拎去捐畀前線學生、支持被秋後算賬醫護同民主運動,我會帶頭捐。」
劉公子62歲入獄,人生逆轉,他形容自己「由天堂跌咗落地獄,地獄之下仲有深淵」,惟現在整個人脫胎換骨︰「前半生渾渾噩噩,𠵱家先開竅,希望有機會升返上天堂。我唔要咁長命,要活得精采,活得有良知。」他表示有生之年仍會力撐民主運動,更痛斥警方濫暴製亂,稱警務處處長鄧炳強為「鄧小強」,暗寸對方才是真正的曱甴。
仰慕王喜
談到警察,有「警隊黎明」之稱的現任港島總區高級警司吳樂俊,曾到劉公子寓所拍裸照,劉公子說︰「我08、09年認識佢,當時佢係總督察,風度翩翩,成個才子,𠵱家平頭裝變成大陸仔咁,我冇興趣。佢當時話想做model,但佢做緊督察,當然秘撈,佢朝住錢字看,出賣自己良知。」問到對方可有問他攞錢,他未有點名說︰「老實講,多與少,開口埋口都10萬、8萬唔會少㗎。啲人鬧我哋死基佬,我哋係為興趣,但人格高尚,慘得過有人為錢出賣自己靈魂、肉體、色相。」更承認仍有保留對方當年的寫真相:「唔使丟,將來有人攻擊我,我都有證據喺手。」
對於警方濫暴,劉公子認為特首林鄭月娥才是始作俑者,更替她改諧音花名「鄭越訛」:「佢出世時,父母可能想佢好似月裏嫦娥咁漂亮,但出到嚟效果越嚟越訛騙,呢場肺炎佢做到啲乜?喺鏡頭用眼淚搭夠,又話擔心醫護安危,貓哭老鼠假慈悲,正一慈禧太后。」
劉公子仍愛「集郵」,但已轉移目標︰「以前鍾意靚仔,𠵱家你哋黎智英先生,我當佢英雄。我仰慕王喜敢作敢為,凡係肯發聲、有良知嘅藝人我都欣賞,亦好欣賞議員許智峯、譚文豪等。」
撰文:陳杰
攝影:郭賢興
場地提供:火鍋頭