[據英國傳媒報道，希臘球隊奧林比亞高斯班主馬連基斯（Evangelos Marinakis）喺個人ig上表示，自己確診武漢肺炎。同時貴為英冠球隊諾定咸森林班主嘅馬連基斯，喺過去14日潛伏期中曾到阿聯酋球場睇奧林比亞高斯作客阿仙奴嘅歐霸賽事，亦有睇森林嘅英冠聯賽，目前正按照醫生指示進行治療。
報道指，呢位52歲嘅希臘班主曾到阿仙奴主場睇歐霸，更喺賽後進入更衣室同奧林比亞高斯球員慶祝（上圖）。馬連基斯周一喺社交媒體交代自己確診消息：「我確診咗武漢肺炎，我認為自己有必要告訴大家，目前我感覺良好。」
另外《每日電訊報》報道，周末馬連基斯被影到有去睇諾定咸森林對米禾爾場波，佢賽前亦有同唔少球迷握手影相，但就未知佢有冇同球員交流。另外，現時奧林比亞高斯職球員正接受病毒測試，但未知周中主場對狼隊嘅歐霸盃會否如期進行。