中國玻璃心係人都知，所以當世衞（WHO）將來自武漢嘅新型冠狀病毒肺炎命名做「COVID-19」即係「新冠肺炎」後，邊個講武漢肺炎，即使係美國國務卿蓬佩奧講，一樣開足火力鬧。而香港建制派咁叻擦鞋，自然有樣學樣，噚日工聯會何啟明喺立法會鬧陳志全同張超雄將新冠肺炎叫做武漢肺炎，係抹黑中國，但佢就忽然「6號」（陸浩明）上身，學埋佢亂噏，不惜用抹黑香港手法，話「唔通沙士要加香港兩個字上去咩？」去擦北京鞋。
稱「武漢肺炎」抹黑中國
噚日立法會衞生事務委員會今早召開特別會議，會上陳志全同張超雄用武漢肺炎叫中國嘅新冠肺炎，何啟明就食住上，話佢兩個專登要叫做武漢病毒，令人十分遺憾，仲話佢兩個想抹黑中國，仲話去到外國，無論你係中國人越南人韓國人，一樣歧視佢哋，仲叫主席蔣麗芸制止用呢個講法。之後何啟明忽然話：「唔通沙士要加香港兩個字上去咩？」仲話唔係話邊度出現，就邊度抹黑佢。
不過何啟明拎沙士做例子，就真係抹黑香港，係人都知因為中山大學附屬第二醫院的退休教授劉劍倫2003年嚟港入住京華酒店（九龍維景酒店），結果將沙士傳播嚟香港，事後大陸自己都認源頭係廣東河源市，所以沙士即使加地名，都係廣東沙士或河源沙士，一定唔係香港沙士，何啟明叫人唔好抹黑中國，但佢身為港人，為擦北京鞋而去抹黑香港，咁又點計？
李八方