武漢肺炎席捲意大利，早前政府宣佈封城，體育部長史柏達科拿仲表示，繼續踢聯賽係「唔合常理」，周日意甲早場開賽前就叫停比賽，但賽會最後冇理，除咗帕爾馬對史帕爾嗰場延遲外，周日五場比賽就閉門完成。事後史柏達科拿怒插：「足球世界就以為可以唔受限制？今輪嘅意甲，係喺賽會同主席達賓奴極唔負責任下踢囉！」
另外，因為武肺嘅疫情，已經搞到祖雲達斯鬥國際米蘭場大戰要一改再改，不過同日就終於決定喺都靈嘅祖雲達斯球場，閉門上演呢場意甲打吡。雖然祖記球星基斯坦奴朗拿度（C朗）連續11場意甲入球嘅走勢斷纜，不過球隊仍然喺下半場，憑艾朗藍斯同後備上陣嘅保羅戴巴拿各入一球，以2:0力克國際，全取3分後嘅祖記唔止拋離少賽1場嘅國際9分，仲以26戰得63分，力壓62分嘅拉素重返榜首，意甲冠軍仲有排鬥。