【黑鏡線索】
中国肺炎輸出全球，令唔少公司，轉咗畀同事work from home。科技界因為工作性質，喺遙距工作潮流行得比較前，而業界對於遙距係好係壞，一直存在爭議，幾年前，本來容許遙距嘅Yahoo，忽然宣佈唔准再咁做，就係一個例子。
到底遙距對生產力，係好事定係壞事？根據我哋公司呢兩年嘅遙距經驗，答案係：it depends。
首先講講，遙距嘅好處：
首先，生產力最大敵人，係俾人打窒道氣。唔少工作，係要進入某種狀態，即所謂get into the flow，先會做得快做得好。一旦條氣俾人打窒咗，就要花唔少時間先走返入狀態，所以先有「閉關」、「精神時光屋」等等嘅方法。
點解會俾人打窒？因為同事會拍你膊頭，一拍，就窒。拍膊頭點解出事？問題出喺，拍膊頭係實時溝通。實時在於，對方一拍，你身體就會接收到，而接收到之後，就算你叫佢死開啲遲啲先搵佢，叫佢死開本身都係一個要即時畀嘅反應，於是道氣就係咁窒住咗，即係話，佢拍你嗰刻，你已經輸咗。
非同步溝通 唔會被打窒
遙距嘅好處，係當你聚精會神同份proposal搏鬥嘅時候，同事唔會喺行去pantry斟杯水途中，路過拍你膊頭say個hi。當然，佢拍唔到你，都可以send個message畀你，但message你就有機會控制，幾時接收，同幾時畀反應。即係話，將實時溝通，變成async溝通，保住道氣唔會被打窒。諗吓每日每個同事俾人打窒N次損失嘅生產力，乘以同事人數，條數可以好大。
一個反對嘅理由係，async咪即係溝通慢咗，影響生產力？第一，上面提到，實時溝通係最昂貴嘅溝通方法，類似DHL急件，咁async就係平郵。係唔係都實時，即係寄乜鬼都用特急，所以好浪費。掉轉做法，係乜都當平郵寄，除非唔係，唔係就打返電話或zoom。咁一日到底有幾多事情，本質係急件，幾多可以等一等？
我哋經驗，試之前，會估樣樣都係急，但試過之後，會發現，其實冇咁多嘢係急到死人冧樓，如果真係咁多嘢特急，可能係時候，檢討吓公司嘅運作流程。
實情大家都知，好多時，成日懶急嗰個，係高層。尤其係老闆，有乜想知，就要同事即刻答。有乜想傾，就要同事即刻傾。最多拍人膊頭嘅，唔係斟水路過嘅同事，而係有權叫人隨傳隨到嘅上層。即係話，上層嘅人，有無限budget寄急件，於是就乜都寄急件，累到同事生產力下降，最終即係累咗公司。
所以，遙距嘅一個難關，係上層嘅人，唔習慣要等。可能因為要彰顯權力，但更大可能，係因為等即係慢，而慢，喺商業競爭係死罪。問題係，實時溝通嘅快睇得到，濫用實時嘅對生產力嘅影響，就冇咁容易觀察，因為好多時同事自己硬食咗。
下次再講遙距工作嘅其他着與唔着。
撰文：宋漢生
fb : sunghsblog