大批市民前晚到將軍澳尚德邨，悼念四個月前不幸離世的科大學生周梓樂，卻突遭防暴警驅散並拘捕63人，指他們涉嫌非法集結等，其間更一度有近300名市民遭搜查，阮民安也是其中一人，還被警員質問：「有冇紋眉？」杜汶澤前晚就嘲警員摸Tommy條眉是「屎忽鬼」，又怒斥警方：「你哋冇殺人，真係講都冇人信。」
抗暴之戰未平息，前日是科大學生周梓樂在將軍澳尚德邨停車場，高處墮下身亡的第四個月，大批市民到尚德邨哀悼，阮民安（Tommy）也有到場，他在fb寫道：「今晚係梓樂離世四個月。今晚特別想同所有手足喺一齊，互相照應一下，所以安排好鮮花，就嚟咗啦！梓樂，你還好嗎？我們都沒有忘記你！我們所有手足都為你嘅夢想努力中。」
被困三小時
不過，Tommy之後與大批民眾遭警察大包圍截查，雖然他與大部份男士獲先行放走，但非常擔心仍被留在現場的女參加者，並拜託記者要一直拍下女參加者的情況。阮民安獲放行後，接受訪問透露有人被警方截查三至四小時，想去洗手間都無法離開，他說：「我哋獻完花默哀一秒都唔夠，就舉旗話我哋非法集結。」
Tommy昨日回覆《蘋果》被捕時情況，他說：「一默哀完，開眼唔夠十秒就全部人困住唔畀走，前後兩邊包住所有人，困咗我哋三個鐘，搜完男，先到女，留晒啲女仔喺度，佢哋搜完我身之後，影晒相，拍完片，就開始𢱑水吹！佢哋話『Tommy條眉咁靚嘅？』之後摸我條眉話『係咪紋㗎？』我話『X，你估我鄧家彪咩！』佢就真係紋啦！不過紋咗都咁X，佢恨唔到㗎啦！」
「博佢會襲警」
杜汶澤前晚在社交網連環出post狠批警察，他以黑底白字寫道：「不作賊，不心虛。只不過係一個和平嘅悼念活動，從警察嘅態度同陣容，只係反映到一件事……你哋冇殺人，真係講都冇人信。」阿澤之後得悉阮民安出席悼念活動，被警方截查兼被摸眉，他再諷刺警方：「查身份證冇問題，但係點解要摸阿Tommy仔堂眉呢？究竟你係想打佢唔敢打，掂吓佢堂眉都好吖？定係想摸佢條X唔敢摸，求其摸吓堂眉都好呀？屎忽鬼！」有網民提出：「就算正當搜身程序都唔會摸眉。」阿澤則答：「博佢躁，會襲警啩。」
另外，前日是3.8國際婦女節，阿澤在fb貼出拿着寫上「#StandWithYou」紙張的照片，並留言：「撐『性暴力受害人』，You’re Not Alone！警暴可恥，人民不會忘記！一齊寫#StandWithYou影張相tag朋友，撐受害人。」8.31因非法集結罪被捕後，疑遭警察性暴的中大女學生吳傲雪，也有在阿澤貼文留言感激對方支持。
採訪：比華利