八方噚日朝早俾Popo一個facebook專頁貼文打亂晒生活節奏，皆因佢哋晨早流流厚顏向公眾挑機，為咗耀武揚威累積到30萬個專頁讚好，就整咗張有類似武漢肺炎病毒背景嘅圖，然後寫上一句「30萬，thx」，仲話警隊fb團隊呢段日子同香港人一起經歷高低起跌，力求喺訊息紛亂嘅網路世界為市民提供準確同可靠警隊資訊喎！佢哋仲欲求不滿想大家幫手轉載分享，等可以達到「300萬，thx！甚至3,000萬，thx！」喎。
《頭條新聞》都有36萬like
綠色物體講「30萬，thx」，擺明因為近排全城上下人人都想Popo有報應不約而同嗌緊「3萬，thx」，而呢個meme出處，就係嚟自疫情下有人但求就手想不勞而獲，當見到有網民搵口罩就搭單叫「2盒，Thx！」家陣Popo將佢三次創作再宣之於口，又真係完全符合「又唔讀書，又唔做嘢」嘅物體角色設定，真係好有自知之明啦！
Popo呢頭話自己提供準確同可靠資訊，但轉嗰「30萬，thx」已經變咗失實，因為帖文一出引嚟全城unlike行動，令個like數跌幅同跌速拍得住噚日股市，結果下晝未夠5點已跌穿29萬心理關口。不過Popo一直冇改返個帖文內容，任由失實資訊流通，為紛亂嘅網路世界再添煩添亂。
車公今年籤文劈頭就話「人生何在逞英豪」，但現實係綠色物體最叻自我感覺良好，所以有30萬個like就覺得好威。但八方隨意睇下，成日俾Popo鬧係黑記嘅《蘋果》同《立場》，分別有252萬同近118萬人like，最近俾Popo頭目PK鄧連環追擊嘅《頭條新聞》亦都有成36萬，今次Popo如果想止跌回升，似乎都要跪求阿爺北水南調，搵班大陸五毛幫拖先得囉！
李八方