【數碼港】徐子珊舊年12月接受傳媒訪問透露賣車賣樓退出娛圈，移居歐洲生活，更打算喺當地修讀心理學博士學位，但《蘋果》記者前日仍見佢喺貝沙灣寓所出入。徐子珊不施脂粉，戴住cap帽、黑超喺數碼港超市買嘢，佢着住貼身衫凸顯小蠻腰，近期鮮有露面嘅佢養尊處優但未見「發福」，反而瘦咗唔少，原本豐滿上圍都唔見埋，以往嘅性感指數冇晒，素顏嘅佢亦似乎冇途人認到。
忽然自咀
近期武漢肺炎肆虐，但放眼成間超市得徐子珊唔戴口罩，行行吓佢更忽然錫自己手背，然後繼續選購食物，實在有欠衞生。徐子珊嘅目標以蔬菜同肉類為主，佢一路慢慢揀，拎吓嘢食上手望完又放返低，臨走前再掃汽水埋單。記者上前問徐子珊會唔會受疫情影響去外地讀書嘅計劃，佢笑一笑用英文回答：「Thank you。」再問佢身形甚弗，係咪勤做運動有成效？徐子珊都係繼續笑一笑，繼續答：「Thank you。」冇多講幾句就將戰利品放上車，然後揸車返回貝沙灣寓所。
採訪、攝影：徐錦池、孔志豪