武漢肺炎疫情爆發以嚟，法院登記處服務停擺，但隨住公務員取消在家工作，近日各級法院登記處都恢復辦公。但係八方發現，雖然高院登記處重開並且接受入稟申請，但公眾同傳媒就唔畀check入稟狀。嘩，萬一咁啱有牽涉重大公眾利益嘅入稟，咁咪冇人知？咁好大鑊啫！
點知兩日後，司法機構出稿「澄清」，話「如因緊急原因需使用登記處繼續暫停的事務」就可以申請喎。不過魔鬼在細節，八方追問之下，發現要用傳真方式提交申請，冇傳真機嘅話就要親身去填form。司法機構真鬼馬，唔知係想扶植夕陽科技，定生活喺咸豐年代呢吓？
其實今時今日，相信好多香港人都同八方一樣與時並進，尤其是傳媒行業講求效率，每每事態緊急，真係唔知去邊度搵部傳真機！最攞命嘅係，傳真完仲要等回覆，撞正登記處冇人收fax就仲大鑊。咁樣龜速一來一回，你估真係閃電傳真機咩，不如飛鴿傳書把啦！