特首林鄭月娥唔肯封關，令香港武漢肺炎疫情蔓延，但講到做公關嘢，777就一定飛撲去做，例如去工聯會做接線生，噚日仲肉麻到喺fb出po，話趁三八國際勞動婦女節，同佢兩個「抗疫」姊妹、食物及衞生局局長陳肇始同衞生署署長陳漢儀去探望衞生署熱線中心，俾網民狂鬧佢只識做show，連「抗疫姊妹」咁肉麻當有趣都噏得出。荃灣區議員、工黨趙恩來亦發文，鬧777早排去大帽山郊野公園視察，竟然連經營茶水亭廿幾年、好受行山人士愛戴嘅蓮姐都抽水，批評777極度虛偽。
政府逼遷 靠10萬人聯署保檔位
趙恩來話之前接到漁護署單方面通知不獲續約，最後能夠搬地方繼續經營，全因有網民發起10萬人聯署撐蓮姐，佢亦透過各種渠道聯絡漁護署，希望署方重新考慮蓮姐對大帽山嘅貢獻，保留大帽山嘅集體回憶，幾經交涉，漁護署先肯安排附近訪客中心空置小食亭檔位畀蓮姐，但呢個位置比較偏僻，人流亦較少。
蓮姐喺搬遷前可以同777傾到偈，全因武肺疫情影響，漁護署酌情暫時延長茶水亭經營權。逼蓮姐搬走嘅係政府，𠵱家777就去抽蓮姐水為自己貼金，難怪趙恩來見到777個po無明火起，怒轟777高度讚揚蓮姐對大帽山貢獻係消費蓮姐。