通訊事務管理局早排取消本地免費電視台要播放香港電台節目嘅要求，外界普遍認為係懲罰港台節目《頭條新聞》諷刺差人，亦有心益無綫，因為商經局講明，唔會因為咁追收無綫四億頻譜使用費，但奇就奇在明明CCTVB有着數，受害人係港台，但建制派可以講到CCTVB先係「受害人」，港台先係搶CCTVB着數嘅一方，完全調轉嚟講。
葉家寶：霸亞視「黃金時段」
《城市論壇》噚日傾呢單嘢，民建聯議員陳恒鑌話十分支持呢個決定，但佢個邏輯竟然係港台一直佔CCTVB便宜，話港台有自己電視頻道，CCTVB得好辛苦經營令啲觀眾去睇佢個台，又踩港台節目冇廣告，CCTVB𠵱家吊緊鹽水喎，又裁員、又發盈警，可能會蝕錢，港台仲去佔人便宜，反問港台真係醜唔醜喎。咁都未算，陳恒鑌仲踩埋《頭條新聞》，話咁短期內到咁大批投訴嘅節目，應要改嘅改，要cut嘅cut，唔好嘆慢板！
除咗陳恒鑌，同場嘅亞視前執行董事葉家寶又加把嘴，話當年對播放港台節目有好大意見，霸佔亞視黃金時段喎！
面對呢啲歪理，毛孟靜立即反駁陳恒鑌，話頻譜屬公共財產而唔係CCTVB私產，話港台霸咗人哋嘅嘢，但嗰樣嘢原本就唔係嘅，批牌時一早講明晒條件！
亦有網民話CCTVB咁唔滿意，當日大可唔續個牌！仲有嗰四億頻譜使用費，如果唔追收，同畀錢CCTVB做生意有乜分別？當中又有冇官商勾結呢？
除此之外，有網民反駁葉家寶，當年亞視自己冇節目播，唔知幾想播多啲港台節目，而且當年亞視收視率得幾點，何來有黃金時段？
李八方