武漢肺炎肆虐，香港出現「盲搶炎」荒謬現象，搶廁紙、搶米、搶M巾，高登仔將劉雅麗當年金曲《你為了愛情》二創，改為《你你你為了肺炎 今天不冷靜》，網民即召喚原唱者真人演繹。劉雅麗日前應《蘋果》之邀，即場清唱二創的《你你你為了肺炎 今天不冷靜》，雖然歌詞「甩咳」又不啱音，但她也成功完美演繹，令人拍案叫絕。
平時好少搞笑
因多間卡拉OK停止營業，記者只能借到餐廳為劉雅麗做訪問，在零音響器材提供下，她幾乎是清唱：「你你你為了肺炎 今天不冷靜……紙巾等補貨，M巾都清貨」劉雅麗最初被歌詞引到邊唱邊笑：「唔識唱呢啲歌，我真係第一次，我諗住咁hit，咁多friend徇眾要求，我平時好少做呢啲咁搞笑嘅嘢。」當唱到「來貨佢話再加價」這句，因歌詞「甩咳」又不啱音，劉雅麗失笑：「呢句真係有啲撠。」但最後都成功唱出這首大熱二創。
雖然高登仔是業餘，但劉雅麗讚歌詞到肉：「大家苦中作樂，聽落覺得好笑，其實我覺得可悲，upset係因為自私，其實你諗住搞掂自己就得，但有冇諗過真係有人買唔到，呢樣嘢係好唔開心，原來大家唔愛香港，點解要咁樣盲搶。」除了「盲搶炎」，香港還有人打劫廁紙，令劉雅麗啼笑皆非：「千幾蚊廁紙搶嚟做乜，米、口罩、搓手液我都明，廁紙搶嚟做乜，點解香港搞成咁。」疫情令整個娛樂圈幾陷停頓，電影和演唱會全部叫停，劉雅麗的工作也大受影響，但她希望在6月30日能跟媽咪包曉華一同舉行演唱會，皆因她媽咪今年73歲，她覺得兩母女能同台演出會很有意思。
點解唔幫港人
去年實施《禁蒙面法》首日，各區抗爭遍地開花，劉雅麗曾在尖沙嘴義載少女返家：「嗰晚我車完朋友喺藍田返尖沙嘴，見到一個好瘦削全黑衫女仔，見佢截的士但對方唔肯載，我好嬲的士司機點解拒載，所以叫佢上我車，點解要坐地起價？大家香港人點解唔幫大家？」
採訪：余燕儀
攝影：陳俊強
髮型：Dicky Lam of I hair
場地提供：Harlan's（The ONE）