武漢肺炎疫情繼續蔓延，喺歐洲受影響嘅地區越嚟越多。意大利體壇近期處於高度戒備狀態，今晚多場意甲都要閉門作賽；英國方面近日都不斷出現確診個案，都係時候要做好準備。
倡上限500觀眾
英媒報道，政府將會喺周一召集體育界同埋傳媒機構嘅代表，研究一旦武肺持續爆發體壇嘅應對措施。消息指包括英超在內，所有體育比賽都會設入場人數上限，只容許最多500觀眾入場，仲會建議禁止70歲或以上嘅老人家入場，因為佢哋係高危人士，如果屬實，家陣78歲嘅曼聯傳奇領隊費格遜，呢排咪唔可以返奧脫福捧紅魔場？
截至上周五，英國當地已經有超過160人確診同有2人死亡，英國BBC報道，周一嘅會議雖然未必會有大臣級官員出席，但政府方面仍希望透過會議向體育界徵求意見。英超方面喺早兩日已經同意進行部份措施，例如取消賽前球員球證握手儀式，報道指下一步賽會可能會根據政府建議，喺未來兩周賽事閉門作賽。《每日郵報》就指出，體育界認為有必要嚴格限制聚集人數，減低人流杜絕有人喺參與觀看體育比賽時受感染或傳播病毒，所有體育比賽可能只會容許500名觀眾入場。以能容納約75,000人嘅曼聯主場奧脫福球場嚟計，如果成事即係將會只係得番大約0.7%入座率，勢創下球會最低入座率紀錄。
72歲鶴臣續約唔受限
英體壇亦都有其他防疫諗法，天空體育指：「英超正考慮緊其他方法，包括可能會建議甚至禁止70歲或以上嘅人入場，因佢哋好易領嘢。」一旦措施實行，睇嚟費格遜要暫時留喺屋企撐曼聯喇，不過另一位年過70嘅主帥就可以照入場。英超球會水晶宮喺上周五宣佈同72歲領隊鶴臣再續約1季到20/21球季完結，有關禁令當然唔會影響到球隊職球員啦，鶴臣可以繼續入場領軍。