舊年官場花生政事，包括律政司司長鄭若驊11月喺英國倫敦出席講座被示威者包圍，混亂間仆到街上傷及左手，唔見一排先發現原來去完北京治療再返港，佢當時一番讚「祖國」論引嚟被「挾持」質疑。
除手臂固定帶
鄭若驊當時話自己手臂骨折，手腕有部份甩骹，要做開放式骨折復位同固定手術，鑲上鈦金屬片同螺絲，傷勢要3至12個月先會痊癒。甩骹多時嘅鄭若驊，左手原來已經好番，「復工」後變身「工廠女工」，包裝口罩，旨在全民做騷。
鄭若驊喺網誌話，星期日參加咗律政司職員聯誼會舉辦嘅義工活動，將防疫物資如口罩、超市禮券同健康資訊單張逐一包裝好，由非政府機構派發畀長者同低收入家庭，睇佢po嘅相，可見左手已經冇再戴住手臂骨折固定帶。佢又話喎，有幸參與其中，現時疫情仍然嚴峻，希望大家唔好掉以輕心。