前日星期三講過馬會停開投注站，令馬紙馬經銷路受影響、大跌。今個星期一，馬會重開17個投注站，左丁山走去史丹利街投注站一望，不得了，下午兩點幾，入投注站人龍幾乎排到近威靈頓街，相信大部份人係入去存款落電話投注戶口。自從投注站關閉，馬迷又唔准入馬場之後，不少人嘅投注戶口唔夠錢，難怪馬會投注會下跌。
睇番蘋果日報，其他投注站亦係有大把人排隊入內，可見賽馬在香港之重要性，賽馬基本上係香港、一個本港社會之凝結力。董建華特首時期，曾有一個甚麼香港凝結力委員會（正確名稱唔記得了），由關信基教授做主席，研究如何凝結香港人，穩定社會，但教授唔係幾識得研究賽馬之社會凝結力，而整件事後來一如其他董建華項目，好耐無講就沒有了，不了了之，好多非經常性政府委員會，往往如此下場。左丁山大膽講句，賽馬可能係香港社會之最大公約數，入到馬場，就無政見之分，賽馬對香港有重大貢獻，但政府只係識得收取博彩稅，有事就打馬會心口，如保育大館，興建西九故宮博物館，就搵馬會出銀紙，一啲文化事務如特別展覽等等，又係向馬會伸大手板，但政府做過乜嘢幫助馬會？假如老早在大嶼山搵到地方畀馬會興建馬房及練馬場，馬會就唔駛走到老遠嘅從化興建訓練場地，用咗近三十億元在當地投資啦。政府以大幅地段投資迪士尼樂園，幾時見還本？唔蝕死算夠運，點似得年年從賽馬、海外足球博彩稅收到二百一十億元以上稅款咁好搵。
話說改為閉門作賽之後，左丁山入唔到場，電話投注戶口冇乜餘額，眼白白睇住唔落得注，點都唔制，於是搵到一個入場馬主在場內替左丁山入錢到戶口，但用手機投注，始終唔敢、唔慣大膽投注，於是連續幾次為咗慳本，不用一隻馬做膽而搵雙膽，幾次中晒腳而斷中其中一隻馬膽，輸得慘烈，眼光光失咗中十萬八萬四重彩嘅機會，真慘情。於是決心搞繳費靈（OK便利店）及網上轉賬，搵肥仔K幫手上網先至搞掂晒所有手續，現在轉錢好快好方便，但弊傢伙，因太方便轉錢入戶口太容易，輸完又轉錢，結果輸得更多，果然係針無兩頭利，加上在家睇電視落注，電視直播有幾秒delay，睇電視慢啲手就趕唔切最後落注，總之周身唔爽，不似在馬場玩得咁痛快。馬場常客馬主F就對左丁山講：「唔好咁多嘢投訴啦，我依家怕咗出街，好驚被傳染，一個星期有兩次賽馬解悶算係咁，否則我地呢種人會在瘟疫期間患上精神病！」