由於疫情嘅關係，好多香港人特別係細路仔都要留喺屋企。有啲小朋友甚至係年初三之後已經一直留咗喺屋企。而家長們除咗要照顧佢哋之外，亦要照顧自己嘅情緒，十分辛苦。所以大夫今日就決定提供啲抗疫心靈錦囊畀大家。
用酒精搓手液、常常洗手、戴口罩、放水落U形聚水管等等嘅忠告，大夫都係交返畀抗疫權威袁國勇教授繼續講，今日主要就集中喺精神心理健康方面嘅貼士。
而家係抗疫嘅時候，每個人都遇到好大壓力。所以我哋大家都應該盡量對自己好一啲，千祈唔好對自己有過份高的要求，只需要盡量做好自己每一日，逐步逐步沉着地應對就好。
如果情況許可，盡量唔好出外同朋友聚餐、飲宴、打麻雀、打邊爐、宗教聚會等等，因為人多嘅地方就有機會增加互相感染嘅風險。除咗有可能連累屋企人之外，亦都會增加醫護人員嘅負擔。
但係留喺屋企好悶喎，無所事事，點算好呢？
大家可以嘗試聯絡本地同埋外國朋友傾吓偈。
除咗可以用電話之外，亦都可以用視像通話，甚至幾個朋友一齊傾吓偈冇感染風險之餘又可以敍舊，真係幾好！
如果可以的話，可以分享一些口罩或者洗手液畀屋村或街上嘅清潔工人。大夫試過，分享確實能令到人更加開心。
每天記錄一件令你快樂或值得感恩的事，寫吓「快樂日記簿」。一定要保持足夠嘅敏銳度，把生活上一些很小的快樂事情就要記低！記住千祈唔好寫啲悲觀負面嘅嘢入去，因為呢本係快樂日記簿而唔係悲情日記簿。
凡事都有好壞兩方面睇，抗疫時期，多咗時間留在家中，可以多啲陪子女一齊睇正面嘅故事書或者煲韓劇，從中對他們作出人生的指導，亦可以增進彼此感情。此外，亦可以玩集體遊戲，全家大細一齊玩波子棋、層層叠等等。咁樣做可以將壓力化為動力，增進家人感情。
留喺屋企仲可以多啲做室內運動，甚至可以全家一齊跟住YouTuber做瑜伽，出一身汗，煩惱自然遠離！
精神科專科醫生
林煒
想輕輕鬆鬆健康啲，記住留意健康蘋台
http://health.appledaily.com.hk/