特區政府舊年9月16日，大鑼大鼓宣佈喺政府創新辦下成立「對話辦公室」，並由創科局前常任秘書長卓永興擔任主任，為期半年，工作包括「協調特首提出設立的對話平台，包括由政府籌辦及非政府組織建議的相關活動」，唔經唔覺半年過去，呢個「對話辦」仲有大約10日就摺埋，咁究竟「對話」咗啲乜嘢出嚟？八方只係知道，呢個對話辦嘅主任月薪高達28萬，半年就使咗170萬。
第二場公開對話冇聲氣
政府舊年9月搞過一次有150名巿民參與的公開「社區對話」後，原本話區選後即會進行第二場公開社區對話，但一直唔見影，只見777同三名局長邱騰華、羅致光同黃錦星各自進行「自我隔離」式嘅fb直播，而三名局長嘅直播觀看人數，加埋連500人都唔夠。至於政府所謂嘅「閉門深度對話」，究竟搞過幾多次？政府一直冇公佈。
雖然政府一直冇公佈卓永興嘅薪級，但政策創新與統籌辦事處回覆傳媒查詢嗰陣就話，卓永興嘅薪酬係參照首長薪級表第8薪點（D8），埋單計數，半年合約薪酬即係用咗納稅人成170萬元，早前已經俾人大鬧政府大花筒。
民主黨議員林卓廷批評，「777最大嘅問題唔係喺對話，而係唔聽民意」，批評林鄭整呢種「扮對話」嘅對話辦係整色整水，無視香港人主流訴求，包括五大訴求、全面封關等，落區嗰陣更只識鬼崇快閃，唔敢堂堂正正面對巿民傳媒，同呢個對話辦成績一樣，「都係唔見得人」。
李八方