張寶華和黎芷珊因曾乘坐「疫輪」鑽石公主號，落船後即時自我隔離，近日已開始投入工作及社交生活。張寶華原本日前在中環的上海總會訂枱，為黎芷珊補祝本月1日的生日，但最終被上海總會取消訂枱，身為該會會員的張寶華覺得被歧視，相當氣憤。張寶華前晚跟黎芷珊轉移陣地，到尖沙嘴一日本餐廳食生日飯，張寶華表示聽取網民及議員提議後，會向平等機會委員會投訴。
「呢餐飯真係艱難」
前晚的晚飯由電台DJ林柏希安排，張寶華向黎芷珊送上鮮花及搓手液，林柏希則送上蛋糕，黎芷珊許願後說：「希望疫情快啲過去，同埋大家要身體健康，百毒不侵！」各人碰杯後，張寶華笑說：「呢餐飯真係艱難。」重提被上海總會取消訂枱，她說：「佢哋嘅回覆令我好愕然，我哋又唔係病人，但你imply（意味）我哋係帶菌者。我有問我幾時可以再嚟，佢答唔知，即係叫我唔好再嚟，我梗係退會！」
張寶華坦言未想過會因隔離而被拒絕訂枱：「我目的唔係要告佢哋，只希望透過呢件事傳遞訊息，我隔咗30日先正式返工，今日第40日先出嚟食第一餐飯。」黎芷珊亦表示自己已隔離30多日，問到眼鏡生意有否受疫情影響？她指幸好現時很多人買平光眼鏡防疫，加上有網店，影響不大，但演藝事業則大受影響：「司儀工作冇晒，我未試過月曆上嘅2月係『吉』。」
平機會：殘疾包括病毒
張寶華昨日在社交網留言，指有立法會議員建議她向平機會投訴：「我考慮了一會，覺得也值得，我食個飯都會被歧視，其他人都一樣可能因為呢個病受到不公平的對待。」又指：「直到半夜，有一位長輩朋友打畀我，說上海總會理事會已經知道事件並希望向我道歉。」《蘋果》昨向平機會查詢獲回覆：「平機會不會對個別個案的細節作出評論。」不過就解釋根據《殘疾歧視條例》，「殘疾」定義包括體內可能引致疾病的有機體如病毒。據知上海總會昨晚通知會員，推出外賣自取有九折優惠。
採訪：黃曉妍、皓騫、唐如
攝影：陳慧安