有「國標女王」之稱嘅44歲台灣女藝人劉真，因主動脈瓣狹窄上個月初喺台北進行心臟主動脈瓣膜置換手術，不幸喺手術中途出現突發情況，心臟停頓，要緊急裝上人工心肺機搶救，之後再換裝心室輔助器，目前等待換心，不過手術之後到𠵱家已一個月，劉真仲未醒，而佢嘅老公辛龍就一直守喺病床前。
未來幾日關鍵期
前日傳出劉真昏迷原因，原來佢有腦中風同血栓塞情況，做咗四次清除腦部血塊手術，仍然冇辦法清除乾淨，經過幾日嘅觀察後，院方發現劉真頭部仍然腫脹，前晚又再進行清除剩餘血塊嘅手術。據知呢一次嘅手術係最後一搏，之後幾日係劉真嘅關鍵期，因為佢受腦中風影響，有半邊身體郁唔到，情況令人憂心。劉真手術後到𠵱家，仍然要靠心室輔助器同呼吸器維持生命，目前關鍵係院方需要評估腦中風嘅程度，如果一直冇意識，又或評估後腦中風程度會影響到未來照護，接受心臟移植機率更加低。
對於劉真嘅情況，台灣藝人吳宗憲回應：「我這邊的立場已經跟大家重申過了，實在沒有辦法代替發言，也感謝關心，希望一起為他們祈福，其他相關的內容還是要家屬那邊才能做回答。」劉真經理人亦回覆傳媒指唔可以代表劉真家人對外發言。
撰文：馮仁昭