利物浦今季要贏英超、英足盃同埋歐聯成為三冠王終於夢碎！周二紅軍喺英足盃第五圈作客車路士，同上場聯賽輸畀屈福特比，領隊高普換咗七個正選，點知副選門將阿祖安卡斯迪路嚴重犯錯，加上下半場再俾巴克里射破，結果紅軍以0:2落敗，近三場作客全部輸晒兼冇入波，賽後領隊高普仲好擔心球隊嘅防守㖭！
其實英足盃出局高普都唔使太過唔開心，事關紅軍之前擔心會唔會因為武漢肺炎搞到聯賽腰斬冇咗個冠軍嘅疑慮，隨住英超賽會表示會有安排確保完成球季，睇怕利物浦今季要贏聯賽冠軍都唔係太大問題。
大輪換「撞車」 三冠王夢碎
今場波高普收起正選門將艾利臣比加、穆罕默德沙拿等主力，不過都仲有華基爾雲迪積克同沙迪奧文尼，連同日本球星南野拓實一齊出戰，實力本來都唔太差，點知踢到13分鐘，車仔前鋒韋利安禁區頂一腳非常正中嘅衝力射球，阿祖安竟然「彈琵琶」將個波擋咗入網，加上文尼同南野拓實先後門前失機，令紅軍半場落後一粒。下半場紅軍冇乜起色，踢到64分鐘再俾巴克里遠射攻破，之後紅軍換入法明奴同沙拿都追唔番，注定紅軍0:2輸波16強止步，更加無緣追平1999年曼聯嘅英超、歐聯及英足盃傳統三冠王紀錄。
賽後領隊高普就解釋點解要大幅輪換：「我哋上場對屈福特踢得好差，今場都踢得算係咁，我知道今場比賽會踢得好激烈，所以先換咗七個正選球員，一啲年輕人要畀機會佢哋上陣，唔係留喺屋企就得囉！」不過高普似乎有啲擔心球隊近期嘅防守：「我哋走得咁遠，係因為之前防守好，但近四場都俾對手入波。我唔擔心球隊會失去動力，輸兩粒原因就係我哋犯錯囉！」至於車路士領隊林柏特就話，好自豪可以搞掂紅軍，因為對方係英格蘭最好嘅球隊。
閉門都會完成聯賽
雖然紅軍英足盃出局，歐聯又落後緊，不過英超領先成22分可以話十拿九穩，雖然有紅軍粉絲擔心過，今季英超會唔會因為武漢肺炎要腰斬，搞到利物浦捧唔到第一個英超冠軍，不過英超賽會同英足總已經制定咗一套應變方案，假如英國唔好彩出現社區爆發，英超都會閉門踢埋佢，咁就唔使怕紅軍會冇咗個冠軍喇！