特首林鄭月娥俾人插佢喺交畀北京抗疫報告入面，將抗疫政治化；噚日佢又有新玩法，今次就將抗疫當公關騷搞，去有疫症嘅青衣長康邨康美樓視察，但呢個視察就厲害，又唔上樓、又唔探訪「疫廈」居民，圍住大廈一圈、同公務員傾吓就當視察，仲要畀居民踢爆政府事前幾日搞靚條邨周圍環境，為求搞好場騷。
唔上樓急急走
777未到，噚日上午10點左右已有大批警員喺康美樓附近一帶佈防，到11點左右，777架車就到埗，仲一支箭咁駛入消防通道落車，之後就火速步入康美樓A翼地下嘅社會福利署南青衣綜合家庭服務中心。事後新聞處話，佢同中心員工交談，房屋署助理署長陸慶全同房署職員就向777滙報康美樓清潔消毒進度，同埋上次撤離康美樓各層細節。之後777去康美樓正門，不過佢冇上樓探訪，好快就出嚟，再喺大廈外面聽吓滙報後就急急走人，前後做騷只有22分鐘。
777走嘅時候，有記者問佢「點解唔上樓巡視」，佢完全唔應，又有市民大聲鬧高叫「民意叫你落台」、「五大訴求 缺一不可」、「解散警隊 刻不容緩」，777完全扮聽唔到，有居民仲踢爆前兩日傳佢會到長康邨，房署呢兩日立即加強清潔，連附近一直冇人清嘅雜物、工程車清走埋，無非為林鄭做騷配合，八方覺得真係好有大陸領導考察做騷嘅味道。
李八方