【本報訊】通訊局准無線停播包括《頭條新聞》在內的港台電目，藝人杜汶澤旗下逾94萬用戶追隨的facebook專頁「杜汶澤 喱騷」宣佈，日後將轉發港台facebook專頁發佈的節目，「即時幫港台增加94萬觀眾群！邊個唔睇、唔like正衰仔！」
黃秋生：攞咗免費牌又唔負責任
專頁又嘲諷「CCTVB（無綫電視）唔係以為真係好多人睇佢個台呀？無人識你呀！企開啲啦！啲人睇《頭條新聞》都係經YouTube同FB㗎咋！」杜汶澤回覆《蘋果》說︰「第一件事唔使太擔心先，TVB都冇人睇，只不過係整個政權同下一代過唔去，睇TVB啲人老咗會死，冇新嚟㗎。」藝人黃秋生亦回覆《蘋果》指︰「咁做咩要畀佢（TVB）免費牌呢？着數你就攞咗，應負嘅責任你又唔負」。
《頭條新聞》「驚方訊息」環節主持王喜亦在facebook質疑，本地免費電視台本來要負的公共責任，就是協助推廣公營製作的節目到社會各階層，但通訊局竟免除電視台這種公共責任，「希望本地免費電視台的事務會因此蒸蒸日上，而不是人間蒸發。」
對於警方稱會投訴「驚方訊息」嘲諷警方調查死亡案件不認真、不專業，未有譴責或批評警方形容為「暴徒」的示威者及提到撐警聲音，王喜回覆《蘋果》表示：「本人必須指出，一哥的幽默和客氣的說話內容，會令公眾對警隊產生錯誤看法，誤解警隊，若大眾認知對警隊失去信心，不法之徒便有機可乘。」
■記者余燕儀、何永寧