武漢肺炎疫情擴散不受控，病毒無形，抗疫必須杜絕所有親密接觸。惡疫重創各行各業，服務性行業尤其首當其衝，藝人陳偉成（Avis）在港共擁有6間髮型屋和3間健身室、亞姐李妮開美容院、鄧洢玲（阿旦）則開樓上按摩店，他們皆聞疫色變，各自想辦法保店。Avis為提供良好衞生環境予客人，每間舖月花5位數消毒。
採訪：比華利
攝影：陳慧安
現年37歲的陳偉成在港九有6間髮型屋和3間健身室，受疫情影響，上月生意勁跌要「倒貼」，他上月斥資7位數於北角開設新髮型屋，撞正疫巿開業。Avis日前在新店接受訪問時說：「因為一早plan好，店舖簽晒約唔縮得，上年有逆權運動，今年有肺炎，呢幾年間創業嘅人好辛苦，好影響。」
陳偉成與員工度時艱
Avis這幾年一直有擴充計劃，但因為受疫情影響，不敢繼續計劃：「𠵱家唔敢再plan住，穩定咗生意先再諗，今年守得住好緊要，如果間間舖都蝕錢，就好難守得住，最慘唔係自己，仲有一班員工，每間都有十個、八個員工，我唔會話因疫情炒咗佢哋，變咗大家要辛苦啲，共度時艱。」北角新店方面，Avis說：「呢間店肯定會辛苦啲，可能守耐啲，呢半年、一年冇錢賺，我會團結成team捱落去。」
Avis很緊張每間舖頭的防疫：「我早年都開髮型屋，我第一間店經歷過沙士，會叫員工做好啲清潔消毒，每剪完一個客會抹枱、凳同鏡，又用消毒藥水噴鉸剪，客人都可以全程戴口罩整頭。」提到現時疫情嚴峻，客人會否沒心情弄頭髮？Avis說：「好多人客見疫情勁，忍住唔剪，我哋生意跌咗六、七成。」Avis立即計數開源節流：「好多大業主企硬唔肯減，我銅鑼灣健身室係細業主，佢就好體諒免我一個月租，我哋同時又要為保障客人大量搜購防疫產品，每間舖每個月都多咗5位數額外開支。」不過，Avis不想把負擔轉嫁給員工：「我冇扣員工人工，team work嘛，疫情最多蝕一、兩個月，齊心努力，之後賺番囉。」
鄧洢玲賣防疫產品幫補
鄧洢玲（阿旦）三年前動用「姑婆本」創業，在銅鑼灣經營樓上按摩店，難得捱過重重難關，才把生意上軌道。去年因逆權運動，銅鑼灣每個周末周日都有抗爭活動，警民爆發衝突，又有催淚彈放題，港鐵站關閉。阿旦大嘆過去半年生意已不穩定，已蝕入肉，近期又爆出武漢肺炎，她說：「呢兩波浪好刺激，原本按摩店租約到今年年尾，我會尊重合約精神，呢刻都想繼續撐落去，set up開店到𠵱家，我哋花咗好多心血，捱過好多先做到咁嘅成績，慶幸開店一年半回咗本，𠵱家嘔番啲出嚟，我唔想放棄。」
阿旦近日在店中發售防疫產品幫補收入，她說：「朋友調製香薰消毒噴霧幾好，我入咗批貨嚟賣吓。」她又強調按摩店做足防疫措施，毛巾會放紫外光燈櫃消毒，水杯除用洗潔精清洗外，還會再用熱水「淥」杯殺菌。
李妮安排彈性上班
前亞姐李妮退出幕前，於2013年在尖沙嘴經營美容店，除為客人提供做facial，還出售來自澳洲的美容產品，開業7年，儲下不少熟客，可是年初香港爆出武漢肺炎，疫情令客人卻步，李妮店中生意下滑三成，但她以平常心面對。李妮提到為疫情的安排說：「我哋店有三間美容房，每日都會消毒，盡量唔會book咁密，每位嚟做facial嘅客人，我哋都會問下佢近日去過乜嘢地方。」
為減少感染風險，李妮更讓員工彈性上班：「每日安排一個美容師返嚟為預約客人服務，員工彈性上班唔使扣人工同假期，維持一切運作正常，員工士氣好緊要，舖頭需要佢哋，家庭都需要佢哋，我盡量唔想有乜嘢改動。」李妮又貼心為顧客和商場清潔工人送上口罩，為減省成本，她指已聯絡商場業主商量減租事宜，有待對方回覆。