伍詠薇（伍姑娘）領軍主持嘅ViuTV新節目《埋嚟睇 埋嚟玩》前晚開播，有觀眾睇過節目後，批評伍姑娘轉數慢。
唔明觀眾弦外音
《埋嚟睇 埋嚟玩》會介紹本地以至海外吃喝玩樂情報、奇人趣事之外，最吸引人係每集會派4千元，主持公佈問題後，觀眾透過節目提供嘅WhatsApp號碼提交答案，最具創意4位參加者，可瓜分4千元獎金。
前晚首集問題係「最想任食啲咩？」其中一位家庭觀眾答案係「阿嫲整嘅南乳炆鵝」，伍姑娘即反問：「點解你答想任食阿嫲整嘅南乳炆鴨（鵝）？」家庭觀眾答：「因為已經冇機會再食喇！」伍姑娘再問：「點解呀？」家庭觀眾回應：「因為佢上咗天堂！」正當其他主持人都露出慨嘆嘅表情時，伍姑娘卻一臉輕鬆反問：「咁你可以學整嘛！你唔識我嚟教你整好唔好？」
家庭觀眾收線前雖然係笑住回應話「好吖」，但有觀眾就認為伍姑娘點解反應咁慢，又指該位觀眾講到「冇機會再食」時都應該察覺到，故對伍姑娘嘅反應完全唔理解。有人仲留言批評伍姑娘話：「佢個腦係咪失落咗喺巴黎鐵塔下呀！」、「可能伍詠薇仲以為自己兜得好叻？」、「一問點解我即時覺得好離譜囉！」等。伍姑娘噚日傍晚喺fb開live接受網民意見，話會作出改善。
撰文：馮仁昭