香港人喺武漢肺炎於大陸爆發之初，已經全面、全球撲口罩，不過好快大陸全面大爆發，香港人點夠大陸人搶口罩？再加上成個林鄭政府袖手旁觀，只識叫健康嘅人唔好戴，結果口罩被炒到飛起，好多基層市民冇口罩用。香港民意研究所早排展開咗「社區健康計劃」，調查市民口罩存量，發現巿民目前平均嘅口罩儲備日數為51日，而離島、黃大仙、屯門、葵青同深水埗市民嘅口罩儲備就低於全港平均數。
包括屯門 黃大仙 深水埗
香港民意研究所於1月29日起展開咗「社區健康計劃」，以網上問卷形式持續調查市民對疫情同政府措施等意見，並將最新結果喺網上「社區健康資訊系統」發佈。鍾庭耀噚日發表呢個系統嘅「第一號報告」，截至前日為止，香港巿民目前平均嘅口罩儲備日數為51日，全港18區中，口罩儲備低於50日嘅地區包括離島、黃大仙、屯門、葵青同深水埗區。若以全港小選區計算，觀塘嘅牛頭角下邨、深水埗嘅荔枝角北、屯門嘅悅湖、東區嘅樂康，口罩儲備屬全港最低，只有40日或以下。
鍾庭耀建議，每名巿民以6個星期嘅口罩用量為基準，將超過基準嘅口罩儲備，透過合作社點算後轉贈或者轉賣畀有需要嘅香港巿民，如果市民有親戚朋友喺低於全港平均口罩儲備數區域居住，亦不妨將多出嚟嘅口罩同佢哋分享，鍾庭耀更希望今次公佈嘅數據，可以令大家更有動力設立「民間口罩合作社」，進行民間自救。
李八方