馬會在3月2日重新開放17個投注站，縮短時間辦公，但不接受投注，唯一工作係畀馬迷開網上投注戶口及在投注戶口存錢。唔可以在投注站投注，不少馬迷，特別係普羅藍領及年老馬迷，齊呼冇癮，點解開放投注站但又唔畀落注，睇落係怕人多聚集，易生肺炎感染之故。馬會唔敢冒風險，只是各方矚目之打吡大賽將於3月22日舉行，係每年馬季盛事，不止香港馬迷、馬主重視，英澳紐愛爾蘭之純種馬育馬界亦嚴肅注視，原因係贏得打吡冠軍嘅靚馬，必然令佢嘅父系配種聲價提高，有助育馬場宣傳，例如2013/14之打吡冠軍馬「威爾頓」，出於種馬Holy Roman Emperor，「威爾頓」取勝後，就有不少香港馬主引入該父系血統新馬，令Holy Roman Emperor不少子嗣賣來香港。
可惜呢，今年極有機會見到打吡幾乎閉門舉行，打吡賽馬日出賽馬匹馬主約三百人，外國馬販、牧場主人、世界育馬圈名人盡皆拒諸門外，着實令人遺憾。左丁山預料到時有老友嘅馬匹可以參加打吡，但左丁山自己唔入得場，更加失望。
或說人群聚集有傳染肺炎，屬高風險，已有馬主不知從那裏染得肺炎，中咗招都唔知。呢樣當然係實情，但馬會對控制馬場秩序甚有經驗，場內消毒、衞生清潔之措施，堪稱全港第一，假若跑打吡之日，可容許全部所有無馬出賽之馬主訂枱入場，入場前測量體溫，訂枱前要申報過往幾日有冇去過中國大陸、意大利、南韓、伊朗，有者不可進場，理論上已減低風險至可接受程度；17個投注站則可在中午十二時至下午五時內投注，每間投注站視乎面積，限定人數（派籌），入站前要測量體溫及登記姓名地址聯絡電話，以便如有需要，即時追蹤隔離。
開放投注站，唔講唔知，關乎就業。投注站關閉後有馬經嘅主筆透露，銷量跌咗七成，幾乎與林鄭民望看齊。如果投注站唔早日重開，馬紙馬簿呢個行業直情連個肺都花埋。一位傳媒界馬主轉發短訊畀左丁山，內容係一位發行商通知報販：「17間投注站下周一（3月2日）重開，如大家需要加大星期一馬紙數，請電……」，星期一係出版星期三賽馬排位表之日，對馬紙馬經都好重要，從短訊可知，投注站不開，報紙就攞少咗，投注站重開，即刻有機會加紙！香港賽馬養活好多人，評馬人、印刷商、報紙攤販、馬紙編輯等等……政府抗疫基金對呢個行頭完全忽視零救濟，冇咗佢地，馬會投注額必定受負面影響，目前餐飲旅遊已經苦不堪言，賽馬如能維持有限度開放，或者還可以挽救一個古老行業（左丁山自1950年代未入學已睇馬經）。