張寶華、黎芷珊和陶傑早前同乘「疫輪」鑽石公主號旅遊，惟跟確診武漢肺炎的80歲老翁同船，三人返港後即作自我隔離，日前三人各自「出關」，張寶華原本約「生死之交」黎芷珊到位於中環的上海總會飯敍，補祝對方54歲生日，豈料卻遭取消訂枱，張寶華在社交網點名批評上海總會歧視，並希望對方澄清「你哋係咪以後唔歡迎我去食飯？」
張寶華原定今晚在位於中環的上海總會為黎芷珊慶祝生日，但最終食肆以「因為老人家多，抵抗力低」為由，取消她的訂枱。身為該總會會員的張寶華，昨日在社交網點名批評上海總會之餘，亦公開和經理整個WhatsApp對話過程，她留言：「到今日，我終於知道被歧視嘅感受！還有一點希望上海總會澄清，我是會員，你哋係咪以後唔歡迎我去食飯？」
「我不是帶菌者」
張寶華指自己足足隔離一個月才上班，又強調衞生防護中心人員亦向她表示隔離28天是絕對安全。留言中她更暗寸警務處長鄧炳強早前出席警星無罩宴：「我警覺性比一哥高，所有朋友聚會一切推卻，保護自己硂保護朋友。但老友生日，我第一次出門為她慶生，她不是別人，是跟我一齊走過死門關嘅芷珊姐姐。」她更表示最初訂枱時，對方還讚她隔離一個月有公德心，想不到一小時後就取消她的訂枱。她留言︰「我莫名其妙！我不是病人、帶菌者！」
事後，張寶華回覆《蘋果》，坦言早上接獲取消訂枱時，已即時致電上海總會了解，但職員表示要將電話轉交給經理，最終張寶華等到斷線仍未有人接聽。她無奈地說：「真心想問，第一：我本身係會員，咁係咪以後唔使再嚟幫襯；第二：係咪所有大陸同胞你哋都唔會接待；第三：警察有人確診，係咪所有警察都唔歡迎？」她炮轟上海總會做法不科學，十足「盲毛」︰「何栢良醫生已經講咗只需要醫學監察14日，唔明點解佢哋咁驚，驚就索性閂門唔好做生意，因為事實證明有人冇病徵但依然被感染，佢哋根本防不勝防。」
嬲受差別待遇
直至昨日下午約4時，張寶華終於收到食肆的回覆，但回答令她十分失望：「我問我可以幾時嚟，佢答唔到，我問如果有內地客人嚟，你哋會唔會歡迎佢哋幫襯？佢答唔到，我再問警察有人中招，如果警司嚟食飯，你哋會唔會畀佢嚟？佢同樣答唔到，不過佢畀我嘅回覆，竟然係話因為我同芷珊之前俾人公開過上船，好多人認得我哋，其他人因為冇公開過名，所以冇問題，咁即係歧視啦！佢仲同我講『張小姐，呢個時間咁敏感，你明㗎啦！』我唔明，我只係覺得有啲暈！」
黎芷珊則回覆說：「都有啲嬲，我已經自我隔離咗一個月，完全冇病徵，如果佢哋咁都擔心，我真係唔知幾時先至出得街！幾時先至為之安全？」《蘋果》致電上海總會了解，但沒人接聽，網民紛紛叫張寶華退會：「低質素的總會」、「追回會費！」不過也有網民表示︰「換位思考一下，其他的客人會願意？」、「潮流係商店可以揀唔招待邊啲人。」
採訪：勞燕萍、皓騫