民望插水嘅林鄭班子今日慢人幾拍咁派包機到湖北接載滯留港人返港，呢場「救人」大龍鳳，由一直盛傳係替補CS大熱嘅政制及內地事務局局長聶德權，以及同為保安局新局長大熱嘅入境處處長曾國衞，雙雙帶隊出動。政界關注兩位升呢人選搏到盡，係咪顯示「有作為」一面？但佢哋深入武漢呢個疫症重地咁高危，但返港後卻毋須隔離，肯定惹嚟唔少添馬艦中人關注，擔心佢哋喺特首辦政總一帶播毒，最終成個添馬艦都要被隔離就諷刺咯。
政總人人自危
其實傳媒噚日喺記者會都有問到，隨團官員使唔使隔離？衞生署衞生防護中心傳染病處主任張竹君就話喎，如果隨團人士有機會接觸返港人士，會配備足夠防護裝備，所以返港後毋須接受強制檢疫。到底具體係點裝備法？張竹君就話會有感染控制嘅同事向隨行官員提意見，例如喺機場時應該着乜衫，堅稱做足措施就唔使隔離。
政府早前都派包機去日本接載鑽石公主號郵輪乘客，咁今次包機嘅防疫措施同上次有乜分別？張竹君話唔清楚措施有冇再加強，但強調上次已經做足防疫措施以防交叉感染。換個角度睇，可能唔少港人都支持官員唔使隔離安排，皆因可能仲易過動員市民去癱瘓添馬艦。