意大利成為咗武漢肺炎喺歐洲嘅重災區，唔單止連累大部份意甲要延期，就連球隊嘅操練都受到影響，祖雲達斯就宣佈U23球員需要全面隔離，一隊都要停操，連基斯坦奴朗拿度（C朗）都暫時離開意大利避一避。
意丙球隊比安尼斯ASD其中一位球員早前確診，呢支球隊最近就同祖雲達斯U23比賽過，比安尼斯當地之後就再新增咗三宗確診個案。有見及此，祖雲達斯喺星期日就宣佈所有U23球員都要自行隔離至今個月八號，而上星期曾經同U23一齊操練嘅一隊球員都要停操兼自行隔離直至另行通知。C朗就趁機暫時離開意大利，周日返咗去西班牙欣賞舊東家皇家馬德里對巴塞隆拿嘅國家打吡，順便「避炎」。
意甲周三開會傾賽程
受疫情影響，意大利政府宣佈暫停國內6個受影響地區舉行體育賽事至3月8日，雖然當局仍然批准比賽以閉門方式進行，不過意甲賽會最後決定將上星期嘅五場意甲延期，包括祖雲達斯對國際米蘭嘅榜首大戰。另外，原定喺星期一舉行，由森多利亞對維羅納嘅賽事亦改期到5月13日，即係同另外五場受影響嘅賽事同日進行。由於家陣意甲賽程搞到亂晒，其中阿特蘭大對薩斯索羅，同埋國際米蘭對森多利亞呢兩場賽事目前仲未搵到合適嘅補賽日期，意甲賽會將會喺星期三同20支意甲球會嘅代表舉行一次特別會議，商討各支球隊嘅賽程安排。
阿特蘭大開火炒萊切
雖然意甲多場賽事都要延期，不過上星期仲有四場賽事可以如期舉行，其中周日意甲，由萊切主場迎戰阿特蘭大，呢場波就實施咗好嚴格嘅防疫措施，嚟自北部城市貝加莫嘅阿特蘭大球迷入場前都要檢查體溫。雖然對客隊球迷嚟講係麻煩啲，不過阿特蘭大今場就大炒萊切7:2，今季已經第5次單場入起碼5球，上次有球隊單季至少5場聯賽都入對手5球，已經係1958/59球季嘅AC米蘭，今場入場幾麻煩都抵番晒啦！