【黑鏡線索】
過去幾十年，主流香港，一直都幾大中華膠。就算係大鑊到八九六四，都無損中国人身份認同，莫講話08北京奧運呢啲巔峯。
然後你見，個中国認同人數，不斷下跌，跌到而家剩返兩三成。而當中，分年齡層咁睇，好明顯，係年紀越大，轉得越慢。六七十歲，慢過四五十歲，四五十歲，又慢過三四十歲。點解呢？
認同轉變，同體力無關。係，個腦可能轉身慢啲，但係而家唔係搶答題，甩開大中華擁抱，轉念唔使轉數好快。一個解釋，係收成期嘅人，唔想俾人阻住發大財。
但未必解釋得晒，因為拉闊個畫面去睇，就算係其他嘢，普遍係年紀越大，會越固執，越難轉念。點解？
轉念成本大 打倒昨日的我
轉念有成本。一個成本，係關於未來。你對未來嘅計劃，係基於一啲諗法，而當諗法改變，咁計劃就要跟住變。但改變計劃可大可小，最好梗係避得就避，免得就免。
另一個成本係，改變諗法，會同以前嘅自己有衝突。當然，你可以話只不過係sunk cost，都過咗去啦。問題係，你呢一刻喺自己心目中嘅形象，係嚟自你記憶中嘅自己，所以過去同現在，其實唔係咁容易斬斷。
斬唔斷，所以成本係要面對自己之前錯得好交關嘅呢個心理關口。例如我有個朋友，十年前寫專欄，話中国人（嗰時叫大陸人）落嚟北區買嘢，係好事，促進經濟，要擁抱。今日住北區嘅佢，係光復上水嘅堅實支持者，當其他人都唔記得嘅時候，佢對自己以前寫過嘅文，仲係好耿耿於懷。
一個諗法越keep得耐，就越多呢啲記憶要面對。打倒昨日的我，可能係小事。但年紀越大，越多以前，要打倒昨日、前日、大前日、一直數到廿年前一日的我，就唔係咁輕鬆。
所以，轉念本身好事小，但前前後後嘅成本，加加埋埋，都幾係嘢，貴係貴在chasing down the implications。萬一個諗法好關乎核心，例如身份認同，或者好公開，咁就更加令人卻步。於是，自我保護機制，係寧願唔面對個真相，總有九百幾個理由說服自己，冇事冇事，nothing to watch here。
轉念難，所以status quo好惡，而當年主流係大中華膠。啲藍絲、建制，最鍾意話英國人點樣點樣整埋啲殖民教育課程，埋下地雷，特區政府繼承咗令到學生戀殖反中。大佬，大英帝國屬土時代，中學教科書，關於二戰後嘅中史，得嗰半版，我係去到讀大學，先知中共奪權之後日子幾大鑊。
轉念難，但可以克服。例如，情況越惡劣，就越多人選擇面對。過去幾年，八三一落閘到雨傘，到DQ到反送中警暴，到光復香港到自救抗疫，每一次，都令更多人的起心肝跳咗去對面。
越多人一齊陪住跳，又會覺得冇咁難。例如，香港成代人，三十年嚟唔少有份幫中国經濟起飛，點樣面對中国崛起竟然係危害人類？但諗起精明如誠哥，多年嚟為中国仆心仆命、出錢出力，到頭來換嚟「別讓李嘉誠跑了」、被封「曱甴王」，搞成咁，佢耄耋之年，都仲能夠積極面對，同大家一齊自己香港自己救，帶頭示範，時代革命，有望又多一批人加入，各自努力，光復香港。
撰文：宋漢生
fb : sunghsblog