香港特區政府宣佈，問責團隊及行會非官守成員將捐出大嗱嗱一個月薪酬予慈善團體，跟市民共度時艱。林鄭的好姊姊葉劉隨即踢爆，官員不減薪是「計過數」的：「捐一個月梗係冇減薪咁傷，減薪令個基數低咗，以後加返都係低，計過條數可能冇咁肉赤。」你減薪覺得「肉赤」？市民納稅何止肉赤，簡直椎心刺骨，泣血漣如。
現在惺惺作態捐一個月人工，好比天天打家劫舍的黑社會，突然在某個初一十五宣佈：「阿公知道各位呢排好手緊，嗱，本社團就不嬲都體恤民情嘅，所以決定將今日收返嚟嘅保護費，統統捐晒去街坊福利會，滿唔滿意呀？」但肥水不流別人田，社團做嘢唔使你教，那個「街坊福利會」當然也由自己友控制，正如特區政府高官捐的慈善團體，高級顧問也包括鄧炳強、李家超、陳肇始等。
平情而論，特區政府與黑社會確實有很多共通點，隨口就數到五個（歡迎補充）：
一、黑社會要你交保護費，政府要你納稅。
二、黑社會有阿公，政府有阿爺。
三、黑社會為了社團利益，可以殺人；政府為了國家利益，一樣可以殺人，正如梁振英在二零一七年所說：「以國家名義殺人並不犯法。」
四、你不信任黑社會，你更不信任政府。
五、反黑社會，爛仔打你；反政府，有牌爛仔打你。
當然，用特區政府比擬黑社會，對黑社會並不公道。黑幫大佬照計真係好打得，而行政長官只係號稱「好打得」。黑社會愛臉子，發財立品；政府則不知恥，立法製亂。還有兩者最大的分別是：黑社會收你保護費，就不再騷擾你，但政府收了保護費，卻用來買槍炮對付你。
捐薪之舉實在太虛偽了，所謂「賤人就是矯情」，主流民意根本無比清晰：大家沒要求你捐薪，只期望你捐軀。