8.31轉眼半年，抗爭運動亦戰火重燃，而喺呢個令我哋會一生銘記暴警同暴政嘅日子嚟到前夕，《蘋果》副社長陳沛敏又收到「手足」一份禮物，就係「影攝食」嘅手繪漫畫同佢嘅新作《影攝食──盧建民攝影集》，影攝食仲鼓勵香港人，武漢肺炎摧殘香港下，大家要喺絕望中生活，與其坐以待斃，不如一同抗爭。
影攝食雖然身陷牢獄，但佢嘅攝影集全部由本人親自揀相同執筆，早排網上預售過，訂購日前已經全數寄出，所以大家會陸續收到本書，而現時就正公開發售。攝影集之所以特別選擇喺2月面世，因為正值「魚蛋革命」四周年，書內除收錄咗佢影嘅過百張相外，亦有一班友好同道同法律界人士仗義執筆，包括吳靄儀大狀、劉偉聰大狀、黃國桐律師及「墳總」青永屍等，本書扣除成本後，收入會捐畀幾個抗爭基金，另外部份會做影攝食家人生活費同訴訟費用。
為醫護打氣加油
影攝食幾張手繪漫畫都同疫情有關，一幅籲大家停止搶購物資、一幅問777幾時將港中醫院同芝麻灣等轉做隔離營，仲有CSI口罩去晒邊；仲有張畫咗件Green Object，指POPO照飯敍變相令病毒傳播，當777訓示係廢，佢仲同香港人講，瘟疫下唔好畀恐慌吞噬理智，應發揮獅子山下精神互相幫助，又特別同醫護打氣，咁一定可以戰勝疫症，必見曙光！