本欄在星期六講Zoom，星期日講及印度裔CEO，而Zoom嘅創辦人係中國人袁征，咁袁征他日會否成為名揚美國嘅大人物，如Google之Pichai、微軟之Nadella，跟印度裔拼一拼呢？還是會步王安、楊致遠後塵，搞搞吓無以為繼？
翻查資料，袁征先生係山東人，今年50歲，山東科技大學及中國礦業大學，有工學碩士學位，畢業後一心申請移民美國，申請到第九次，卒之在1997年成功移民矽谷，當時連英文都唔多識講，但精於寫電腦程式，入咗一間WebEx寫網上會議軟件，後來CISCO以32億美元收購WebEx，袁征跟住入埋CISCO。2011年袁征開始構思成立新公司，在矽谷搵投資者，有前CISCO同事肯信佢，首先投資25萬美元（上市後變成一億七千五百萬），李嘉誠基金會於2013年入股，其餘便是歷史！現時袁征身家起碼值60億美元，話開始學習蓋茨、朱克伯格，點樣用錢做善事喎！
當年袁征連英文都唔掂，係要申請移民美國，被拒絕一次又一次，卒之去到第九次先至成功，其決心有如山東同鄉梁振英，說過N屆唔選香港特首，最後都要選，爆冷門氣走唐英年。山東硬漢如愚公移山，有無比毅力，去到矽谷奮鬥22年，卒成為美國式billionaire，唔好以為佢係工作狂，據CNBC報道，袁征非常強調Work-life balance，好注重家庭生活，Zoom嘅公司口號座右銘係Delivering Happiness，2018年袁征獲一個職業網站GlassDoor選為最佳CEO，因為99％公司僱員支持佢！袁征堅持終身學習，所有公司員工購買個人書籍或為太太、丈夫、子女買書，即使係兒童書籍，都可以向公司開數，取回買書費用，呢項公司政策就係支持員工多讀書，多自我學習。
袁征一來為咗推動Zoom之會議功能，二來唔喜歡離家出差公幹，飛來飛去，甚少好似其他矽谷高層咁去外地，總係留在聖荷西公司總部，方便放工回家。客戶、投資者要見佢就用Zoom討論。於是袁征慳番不少時間，要嚟做乜？陪大仔打籃球囉，佢位大公子係中學校隊球員，高中二時參加校際比賽，射入三分球破咗學校紀錄。全隊有15人，每次球隊練波、比賽，袁征十次有九次都坐在場邊為兒子吶喊捧場，令教練十分感動，教練對記者講：「矽谷大部分CEO都飛來飛去，冇時間睇阿仔打波，只有呢位先生不止睇比賽，連球隊練波都嚟睇埋！」袁征與NBA亦有關係，金州勇士隊在2016同Zoom簽咗三年合約，由Zoom贊助球隊所用之視像科技。如此人物，會否如其他華裔咁回歸山東，與馬雲、馬化騰一比高低呢？聰明嘅話，就留在矽谷睇兒子打波就最好！