現年38歲前港男吳雲甫，昨日和瑜伽教練女友林瑋如（Jackie）作簡單註冊結婚，因疫情關係不設兄弟姊妹團，也沒有擺酒，二人公開的婚照，更大擺高難度甫士。吳雲甫早上出門接新娘前，接受《蘋果》電話訪問，他開心說：「噚晚唔太瞓得到，接新娘儀式簡單，兄弟姊妹都冇叫，朝早接新娘我單刀赴會，利是全部自己準備，希望冇執漏嘢。」
戴口罩頻補妝
着上卡其色西裝的新郎自己化妝整頭，戴金器的新娘着紅色裙喜氣洋洋，兩人互餵食糖水甜蜜蜜，吳雲甫成功接新娘後表示：「接完新娘，返到男家斟完茶，晏少少註冊，一切順利，冇乜特別儀式，斟完茶，戴咗金器影咗兩張相，咁就搞掂。」
改稱呼更自在
因為武漢肺炎肆虐，一對新人出入都戴上口罩，吳雲甫說：「新娘係咁補妝，因為又戴又除口罩，整花個妝，我自己就冇乜所謂，求其搽少少粉底，自然啲，頭都亂晒。」
相中的吳雲甫情深望着老婆，幸福滿瀉，問到升呢做人夫的心情，他笑說：「因為自己都做過幾十場婚禮司儀，通常感動位要時間培養，因為我哋快靚正，頭先我冇話特別感動到喊，心情都開心嘅，感覺兩家人親密咗，老婆阿哥有一對女兒，好鍾意同我玩，小朋友以前叫我哥哥，𠵱家要改叫我姑丈。我覺得舒服自然咗，𠵱家跟老婆叫阿哥阿嫂，唔會因為諗稱呼叫錯。」
前晚註冊前夕，吳雲甫在社交網貼了一張《龍珠》海報相，問吳雲甫是否接新娘前搵「龍珠」加持，他說：「張舊相2017年喺台中影，噚晚老婆返咗娘家過夜，自己又準備好晒啲結婚嘢，無聊撳手機甫相。」
採訪：皓騫
